BAKI, AzerVoice
İranın xarici işlər naziri Seyid Abbas Araqçi iyunun 23-də Moskvada Rusiya Prezidenti Vladimir Putinlə görüşməyi planlaşdırır.
AzerVoice xəbər verir ki, bu haqqda o, İstanbulda keçirilən mətbuat konfransında danışıb.
“Bu gün Moskvaya gedirəm və sabah səhər Prezident Putinlə görüşüm olacaq. Rusiya İranın dostudur və aramızda strateji tərəfdaşlıq mövcuddur. Biz daim bir-birimizlə məsləhətləşir və mövqelərimizi uzlaşdırırıq. Sabah Rusiya Prezidenti ilə ciddi məsləhətləşmələrim olacaq və əməkdaşlığımızı davam etdirəcəyik” – deyə, Araqçi vurğulayıb.
Nazir əlavə edib ki, Rusiya BMT Təhlükəsizlik Şurasının daimi üzvüdür.
“Biz bilirik ki, onlar Çinlə birlikdə hərbi əməliyyatların dayandırılması ilə bağlı qətnamə təqdim etməyə çalışıblar. Aydındır ki, vəziyyət artıq dəyişib. Mən bu məsələni və bundan sonra necə davranılmalı olduğunu müzakirə edəcəyəm” – deyə, Araqçi bildirib.
Qeyd edək ki, ABŞ Hərbi Hava Qüvvələri iyunun 22-ə keçən gecə İran ərazisində yerləşən Fordo, Nətənz və İsfahan nüvə obyektlərinə hava zərbələri endirib. Hücum nəticəsində hər üç nüvə obyektinin məhv edildiyi qeyd olunub.
