BAKI, AzerVoice
İsrail Hərbi Hava Qüvvələrinə məxsus təyyarələr keçən gecə Qəzza zolağında yerləşən Bureyc qaçqın düşərgəsindəki iki məktəbə hava zərbələri endirib.
AzerVoice xəbər verir ki, bu barədə fələstinli mənbələr məlumat yayıb.
Məlumata görə, hava hücumları nəticəsində əksəriyyəti uşaqlar, qadınlar və yaşlılardan ibarət olmaqla 49 nəfər həyatını itirib.
“İşğalçı qüvvələrin ötən gecə Qəzza zolağının mərkəzində yerləşən Bureyc düşərgəsindəki, köçkünlərə sığınacaq verən Əbu Həmisə məktəbinə iki dəfə endirdiyi hava zərbəsi nəticəsində ölənlərin sayı 33-ə, yaralıların sayı isə 73-ə yüksəlib” - deyə, məlumatda qeyd olunub.
Bundan əlavə bildirilib ki, bu səhər Qəzzanın şərqində yerləşən Kəramə məktəbinin bombalanması nəticəsində 16 nəfər ölüb, onlarla insan yaralanıb.
Eyni kontekstdə, Qəzzanın şimal-şərqindəki Tuffah məhəlləsində yüzlərlə köçkünə sığınacaq verən məktəbə endirilən hava hücumu nəticəsində 15 fələstinli həyatını itirib.
Qeyd edək ki, İsrailin Qəzza zolağına qarşı həyata keçirdiyi hücumlar nəticəsində ölənlərin ümumi sayı 52 min 653-ə, yaralı sayı isə 118 min 897-yə çatıb.
