BAKI, AzerVoice, Nərmin Ağayeva
Türkiyə Prezidenti Rəcəb Tayyib Ərdoğan Şanxay Əməkdaşlıq Təşkilatının (ŞƏT) 25-ci Dövlət və Hökumət Başçıları Zirvəsində fəxri qonaq qismində iştirak etmək üçün Çinin Tianjin şəhərinə səfər edəcək.
AzerVoice xəbər verir ki, Prezidentin kommunikasiyalar üzrə direktoru Burhanəddin Duran sosial media hesabında açıqlama verərək, Ərdoğanın 31 avqust - 1 sentyabr 2025 tarixlərində Tianjin şəhərində keçiriləcək ŞƏT Zirvəsində iştirak edəcəyini bildirib. Duran, Ərdoğanın sentyabrın 1-də genişləndirilmiş formatda keçiriləcək toplantıda çıxış edəcəyini və ev sahibi Çin Xalq Respublikasının Sədri Si Cinpin də daxil olmaqla digər liderlərlə ikitərəfli görüşlər keçirəcəyini qeyd edib.
ŞƏT-in qlobal miqyasda artan təsiri fonunda Türkiyənin bu sammitdə fəxri qonaq statusu ilə iştirakı, ölkənin beynəlxalq aləmdəki rolunu və regional əməkdaşlıq strategiyasını gücləndirmək məqsədini əks etdirir.
Qeyd edək ki, Şanxay Əməkdaşlıq Təşkilatı, Çin, Rusiya, Hindistan, Pakistan və bir sıra Mərkəzi Asiya ölkələrini birləşdirən mühüm regional təşkilatdır. Türkiyənin ŞƏT-dəki iştirakı, ölkənin Asiya və Avrasiya məkanında əməkdaşlığı dərinləşdirmək siyasətinin bir hissəsidir.
