BAKI,AzerVoice, Orxan Qədirzadə

Türkiyə Prezidenti Rəcəb Tayyib Ərdoğan hakim Ədalət və İnkişaf Partiyasının TBMM qrup toplantısında çıxış edərək ölkəsinin xarici siyasətinə və tarixi kimliyinə dair mesajlar verib. O, Türkiyənin regional məsuliyyət daşıyan dövlət olduğunu və yalnız öz sərhədləri ilə məhdudlaşmayacağını bildirib.

Prezident Ərdoğan çıxışında Türkiyənin xaricdə aktiv rol oynayacağını vurğulayıb.

“Fələstində məzlumların yanında dayanır, Sudanda qan tökülməsinin qarşısını almağa çalışırıq. Bütün imkanlarımızla dost və qardaşlarımızın yanındayıq. Bunu etməsək, tarixə xəyanət etmiş olarıq.”-Ərdoğan deyib.

Ərdoğanın sözlərinə görə, Türkiyə regionda sülh, ədalət və sabitlik təşəbbüslərinə rəhbərlik etməkdə davam edəcək.

Prezident uzun illərdir Türkiyə ictimaiyyətində təkrarlanan iddialara münasibət bildirib.

“Bizə on illərlə ərəblərin bizi arxadan vurduğu nağılını danışdılar’-deyə Ərdoğan əlavə edib.

Ərdoğan bunun tarixi manipulyasiya olduğunu və türk-ərəb münasibətlərinin qardaşlıq üzərində qurulduğunu vurğulayıb.

Ərdoğan Türkiyənin tarixi irsini xatırladıb.

“Biz Səlcuqlu və Osmanlı kimi iki böyük dünya dövlətinin mirasını daşıyan bir millətik. Biz dövlətlər arasında sadəcə bir dövlət deyilik, millətlər arasında sadəcə bir millət deyilik.”-deyə Ərdoğan bildirib.

Prezident həmçinin Türkiyənin yalnız öz təhlükəsizliyinə deyil, regiondakı humanitar və siyasi proseslərə də təsir göstərdiyini deyib.

“Bir ayağımız Ankaradadır, digər ayağımız başqa ölkələrdə sülh və ədalət mübarizəsi aparır.”-Ərdoğan deyib.

Ərdoğanın sözlərinə görə, Türkiyə regional münaqişələrin həlli və humanitar dəstək proseslərində lider rolunu davam etdirəcək.