BAKI, Azervoice, Nərmin Ağayeva
Türkiyəni öz bölgəsində strateji qütb dövləti edəcəyik.
Azervoice xəbər verir ki, Türkiyə Prezidenti Rəcəb Tayyib Ərdoğan Ali Hərbi Şura toplantısından əvvəl Anıtkabiri ziyarət edərək, Türkiyənin bölgəsində strateji gücə çevriləcəyini vurğulayıb.
Prezident, “Yenidən formalaşan qlobal sistemdə Türkiyəni qütb dövləti etmək uğrunda mübarizəmiz qurulan tələlərə, daxildən və xaricdən edilən hücumlara baxmayaraq davam edir” - deyə bildirib. Ərdoğan, təhlükəsizlik, demokratiya, iqtisadiyyat, texnologiya və xarici siyasət sahələrində tarixi addımlar atıldığını bildirib.
Anıtkabirdə Ali Hərbi Şura üzvləri ilə birlikdə iştirak edən Ərdoğan, “Şuramızın 2025-ci il toplantısı Türk əsri hədəfinə gedən yolda yeni bir mərhələ olacaq” sözləri ilə prosesin əhəmiyyətini qeyd edib.
Qeyd edək ki, Prezident Ərdoğan Ali Hərbi Şura üzvləri ilə birgə Anıtkabirə əklil qoyub, İstiqlal Marşı səsləndirilib və Atatürkün xatirəsinə bir dəqiqəlik sükut elan edilib.
