BAKI, AzerVoice
İraqın Baş naziri Məhəmməd Şiə əs-Sudani İsrailin Baş naziri Benyamin Netanyahunun yaxın vaxtlarda İrana qarşı yenidən hərbi hücum qərarı verə biləcəyini istisna etmir.
AzerVoice xəbər verir ki, bu barədə əs-Sudani “Asharq al-Awsat” qəzetinə verdiyi müsahibədə danışıb.
Onun fikrincə, bu addım Netanyahunun regionda vəziyyətin sabitləşməsinə imkan verməmək və siyasi hakimiyyətini qoruyub saxlamaq məqsədi daşıya bilər.
“Hamıya məlumdur ki, Netanyahu nə Qəzzada, nə də Livanda atəşkəs şərtlərinə əməl etməyib. Onun İrana yenidən hücum etməsi çox real görünür. Elə bil ki, onun siyasi strategiyası regional münaqişəni davam etdirmək üzərində qurulub – bu isə onun siyasi mövqelərini qorumağa hesablanıb” – deyə, əs-Sudani bildirib.
Əs-Sudaninin sözlərinə görə, İsrail və İran arasında baş verən son hərbi qarşıdurma zamanı Bağdad rəhbərliyi regional sabitlik və sərhədlərinin təhlükəsizliyi ilə bağlı ciddi narahatlıq keçirib. “Sərhəd qonşularının alov içində olduğunu görüb, bu yanğının sizə keçməyəcəyinə inanmaq sadəlövhlük olardı” – deyə, o bildirib.
Xatırladaq ki, İsrail Hərbi Hava Qüvvələri iyunun 13-də İran ərazisinə hava zərbələri endiriblər. Zərbələr nəticəsində çoxlu sayda yüksək rütbəli hərbçi, o cümlədən İran Silahlı Qüvvələrinin Baş Qərargah rəisi Məhəmməd Baqeri, İran İslam İnqilabı Keşikçilər Korpusu (SEPAH) baş komandanı Hüseyn Salami, Xatəm Əl-Ənbiya Qərargahının komandanı Qulaməli Rəşid, 6 nüvə alimi və yüksək vəzifəli şəxslər həlak olub. İran BMT Təhlükəsizlik Şurasının hadisə ilə əlaqədar fövqəladə iclas çağırılmasını istəyib.
Bu hücumlara cavab olaraq isə İran Ordusu İsrailə qarşı "Doğru vəd III" adlı əməliyyat keçirib. Təl-Əviv, Qüds və digər bölgələrə yüzlərlə ballistik raket buraxılıb.
ABŞ isə münaqişənin gərginləşməsindən doqquz gün sonra – 22 iyun gecəsi İrandakı üç nüvə obyektinə hücum etməklə münaqişəyə qoşulub. 23 iyun axşamı İran ABŞ-ın Qətərdə yerləşən və Yaxın Şərqin ən böyük Amerika bazası olan Əl-Udeyd bazasına raket zərbəsi endirib. ABŞ hakimiyyət orqanlarının verdiyi məlumata görə, hücum nəticəsində itki və ya ciddi dağıntı qeydə alınmayıb.
İyunun 24-də ABŞ prezidenti Donald Tramp İsrail və İranın tam atəşkəsin qüvvəyə mindiyini bəyan edib. İsrail tərəfi də ABŞ-ın atəşkəs təklifini qəbul etdiyini və qarşıya qoyulan bütün məqsədlərə nail olunduğunu bildirib.
