BAKI, AzerVoice
ABŞ Türkiyədəki səfirini Suriya üzrə xüsusi nümayəndə təyin edir.
AzerVoice xəbər verir ki, ABŞ prezidenti Donald Trampın yaxın dostu, Ankaradakı hazırkı səfir Tomas Barakın Suriya üzrə xüsusi nümayəndə təyin olunacağı gözlənilir. Bu barədə Reuters agentliyi türk diplomata və məsələdən xəbərdar mənbəyə istinadla məlumat yayıb.
Barakın təyinatı Trampın ötən həftə Bəşər Əsəd rejiminin devrilməsindən sonra Suriyaya tətbiq olunan sanksiyaların ləğv ediləcəyini açıqlamasının ardınca baş verir.
ABŞ Dövlət Departamenti məsələ ilə bağlı şərh verməkdən imtina edib. Lakin ABŞ dövlət katibi Marko Rubio Senatın Xarici Əlaqələr Komitəsində çıxışı zamanı bildirib ki, Tomas Barak və səfirlik əməkdaşlarına Suriyadakı yerli strukturlarla birbaşa əməkdaşlıq etmək səlahiyyəti verilib.
“Biz bu hökumətin sabitliyə doğru irəliləməsinə yardım etmək istəyirik. Əks halda, bölgə yeni bir vətəndaş müharibəsi və xaos təhlükəsi ilə üzləşə bilər”, – deyə Rubio vurğulayıb.
Türkiyə Xarici İşlər Nazirliyi isə Vaşinqtonda ABŞ-Türkiyə arasında Suriya mövzusunda görüş keçirildiyini, Tomas Barakın da həmin görüşdə iştirak etdiyini bildirib. Görüşdə sanksiyaların yumşaldılması və terrorla mübarizə məsələlərinin müzakirə olunduğu qeyd edilib.
Qeyd edək ki, Tramp sanksiyaların ləğvi barədə qərarını Səudiyyə Ərəbistanının vəliəhd şahzadəsi Məhəmməd bin Salman və Türkiyə prezidenti Rəcəb Tayyib Ərdoğanla görüşlərindən sonra açıqlayıb. O, mayın 14-də isə Səudiyyə Ərəbistanında Suriya prezidenti Əhməd əl-Şara ilə də görüş keçirib.
