BAKI, AzerVoice
İsrail ordusuna məxsus pilotsuz uçuş aparatı (PUA) Livanın cənubundakı Kunin qəsəbəsində bir avtomobili raketlə vurub.
AzerVoice xəbər verir ki, bu barədə məlumatı “Janoubia” portalı yayıb.
Məlumata əsasən, hücum nəticəsində “Hizbullah”ın silahlı qoluna mənsub bir üzv hadisə yerində həlak olub.
Avtomobilə raket dəyməsindən sonra maşın alışaraq yanıb. Hadisə Livanın Tir şəhəri yaxınlığında baş verib.
Qeyd edək ki, son günlərdə İsrailin Livana qarşı hava hücumları artıb. İyunun 26-da İsrail PUA-larının hücumu nəticəsində “Hizbullah”ın iki sahə komandiri öldürülmüşdü. Ertəsi gün, iyunun 27-də isə İsrail Hərbi Hava Qüvvələri Nəbatiyyə şəhərinə və onun ətraf hissələrinə hava zərbələri endirib. Hücum nəticəsində bir qadın həlak olub, azı 11 mülki şəxs yaralanıb.
İsrail ordusu hücumların “Hizbullah”ın hərbi infrastrukturuna qarşı yönəldiyini bildirir. “Hizbullah” isə İsrailin hücumlarına cavab olaraq sərhəd bölgələrindən raket atışlarını davam etdirir.
