BAKI, AzerVoice, Nərmin Ağayeva
Suriyanın xarici işlər naziri Şeybani Parisdə İsrail naziri Dermer ilə görüşüb.
AzerVoice xəbər verir ki, Suriyanın xarici işlər naziri Əsəd Həsən Şeybani və Kəşfiyyat Direktoru Hossein Salame Fransanın paytaxtı Parisdə İsrailin strateji işlər naziri Ron Dermer ilə görüşüblər.
Xarici mənbələr bildirir ki, görüş zamanı tərəflər Suriyanın ərazi bütövlüyünü dəstəklədiklərini və ölkəni parçalamaq məqsədi daşıyan layihələrə qarşı olduqlarını bir daha təsdiqləyiblər. Sveydanın Suriyanın ayrılmaz hissəsi olduğu və druz vətəndaşlarının milli toxumanın vacib elementi olduğu vurğulanıb.
Görüşdə Suriyanın cənubunda humanitar vəziyyət müzakirə olunub, tərəflər Sveyda və Bədəvi xalqlarına yardımı artırmaq və onların çətin həyat şəraitini yüngülləşdirmək barədə razılığa gəliblər. Həmçinin 1974-cü il atəşkəs razılaşmasının yenidən aktivləşdirilməsi və İsrailin Suriya ərazilərinə müdaxiləsinin dayandırılması üçün mexanizmin yaradılmasının zəruriliyi qeyd olunub.
Mənbə görüşün cənubda gərginliyi azaltmaq və regionun açıq münaqişəyə çevrilməsinin qarşısını almaq öhdəliyi ilə yekunlaşdığını bildirib.
Qeyd edək ki, Axios xəbər saytının məlumatına görə, İsrailin strateji işlər naziri Ron Dermer ABŞ-ın Ankaradakı səfiri və Suriya üzrə xüsusi nümayəndəsi Tom Barak ilə də görüşüb. İsrail ordusu 1967-ci ildən işğal etdiyi Qolan təpələrindəki bufer zonasını 2024-cü il dekabrın 8-də genişləndirərək Dəməşqin 20 kilometrliyinə qədər yaxınlaşıb.
Xatırladaq ki, iki ölkə arasında 1974-cü ildə qüvvələr bölgüsü sazişi bufer zonanın və silahsızlaşdırılmış zonanın sərhədlərini müəyyən edib. İsrailin baş naziri Benyamin Netanyahu isə Suriyanın cənubunun işğalının daimi olacağına işarə edərək, bölgənin silahsızlaşdırılmasını tələb edib. İyulun 13-də İsrail Sveydada başlayan qarşıdurmaya müdaxilə edərək Suriya ordusuna və Dəməşqdəkı Baş Qərargah qərargahına hücum edib.
