BAKI, AzerVoice, Səməd Əyyubov
Suriyanın bəzi kənd təsərrüfatı məhsulları və toyuq əti idxalına tətbiq etdiyi məhdudiyyət bütün ölkələrə şamil olunan müvəqqəti tədbirdir.
AzerVoice xəbər verir ki, bu barədə Türkiyə Ticarət Nazirliyi məlumat yayıb.
Bildirilib ki, Suriya Quru və Dəniz Limanları İdarəsinin 27 iyul 2025-ci il tarixli qərarına əsasən, yalnız 2025-ci ilin avqust ayı ərzində müəyyən kənd təsərrüfatı məhsullarının (pomidor, xiyar, kartof, balqabaq, badımcan, bibər, alma, üzüm, şaftalı, albalı, armud, qarpız, yemiş, əncir, quru əncir, sarımsaq, yumurta) və toyuq ətinin idxalına məhdudiyyət qoyulub. Qərar məhsulların mənşəyindən asılı olmayaraq bütün ölkələrə tətbiq edilir və müvəqqəti xarakter daşıyır.
Nazirliyin açıqlamasında o da vurğulanıb ki, 8 dekabr 2024 – 17 avqust 2025 tarixləri arasında Türkiyənin Suriyaya ixracı ötən ilin eyni dövrü ilə müqayisədə 54,3 faiz artıb. Hazırda Türkiyə Suriyanın ən böyük ticarət tərəfdaşı mövqeyindədir.
Qeyd edək ki, Suriya ilə ikitərəfli ticarətin davamlı şəkildə inkişaf etdirilməsi istiqamətində Türkiyə Ticarət Nazirliyi ardıcıl fəaliyyət göstərir. Avqustun 5–6-da Suriyanın iqtisadiyyat naziri Nidal Əş-Şaar nümayəndə heyəti ilə birlikdə Türkiyəyə səfər edib. Səfər çərçivəsində ikitərəfli və nümayəndə heyətləri arasında görüşlər keçirilib, Türkiyə–Suriya İqtisadi və Ticarət Birgə Komitəsinin (JETCO) yaradılması haqqında Anlaşma Memorandumu, eləcə də Türkiyə–Suriya İş Şurasının qurulmasına dair saziş daxil olmaqla ümumilikdə 18 sənəd imzalanıb.
Digər tərəfdən, avqustun 28-dən sentyabr ayınadək keçiriləcək Dəməşq Beynəlxalq Ticarət Sərgisində ticarət naziri Ömər Bolatın rəhbərliyi ilə 100-ə yaxın türk şirkətinin iştirakı və 1000 kvadratmetrlik Türkiyə pavilyonunun açılması planlaşdırılır. Həmçinin Türkiyə İxracatçılar Məclisi tərəfindən yüksək səviyyəli ticarət heyəti təşkil ediləcək və müxtəlif sahələr üzrə aparıcı şirkətlər sərgidə geniş təmsil olunacaqlar.
