BAKI, AzerVoice

Uzunömürlülüyün sirri dərmanda gizlidir - alimlər rapamisinin ömrü uzatdığını təsdiqləyir.

AzerVoice xəbər verir ki, London Universitet Kollecinin rəhbərliyi ilə aparılan beynəlxalq araşdırma rapamisin adlı dərmanın laboratoriya heyvanlarında ömrü əhəmiyyətli dərəcədə uzatdığını ortaya qoyub.

Eyni araşdırma metformin dərmanının isə bu baxımdan nəzərəçarpacaq fayda vermədiyini göstərib.

Tədqiqatçılar balıqdan tutmuş meymunlara qədər 8 fərqli növdə aparılan 167 eksperimental araşdırmanı təhlil ediblər. Nəticələrə əsasən, rapamisin az qida qəbulunun (kalori məhdudiyyətinin) yaratdığı təsirlərə yaxın ömür uzadıcı effekt göstərib. Digər tərəfdən, şəkərli diabet xəstələrində geniş istifadə olunan metforminin bu sahədə təsirsiz olduğu müəyyən edilib.

Qeyd olunur ki, rapamisin ilk dəfə 1970-ci illərdə Pasxa adasında tapılmış torpaq bakteriyasından əldə olunub və hazırda immunosupressiv dərman kimi istifadə olunur. O, hüceyrələrin "qida boldur" siqnalını bloklayaraq bədənin enerji metabolizmasına təsir göstərir.

Alimlər insanlarda da bu dərmanın aşağı dozada istifadəsini araşdırırlar. İlkin nəticələr rapamisinin sağlamlıq göstəricilərini yaxşılaşdırdığını göstərsə də, onun immun və reproduktiv sistemlərə yan təsir riskləri mövcuddur. Buna görə də mütəxəssislər ehtiyatlı şəkildə sınaqlara davam edir.

Qeyd edək ki, yaşlanma birbaşa xəstəlik olmasa da, bir çox xroniki xəstəliyin əsasını təşkil edir. Tədqiqatçılar hədəflərinin təkcə uzun ömür deyil, həm də sağlam və keyfiyyətli bir həyat təmin etmək olduğunu vurğulayırlar.