BAKI, AzerVoice
1972-ci ildə Sovet İttifaqı tərəfindən buraxılan və Venera planetinə enmək üçün hazırlanmış yarım tonluq kosmik zond yaxın iki həftə ərzində Yerə nəzarətsiz şəkildə düşə bilər. Bu barədə hollandiyalı peyk izləyicisi və araşdırmaçı Marco Langbroek xəbərdarlıq edib.
Langbroek-in verdiyi məlumata görə, zond 10 may 2025-ci il ətrafında Yer atmosferinə daxil olaraq, alovlar içində planetamıza düşə bilər. O, “Bu, çox nadir və qeyri-adi bir nəzarətsiz yenidən giriş hadisəsi olacaq,” deyərək bildirib ki, sözügedən aparat uğursuz olmuş Sovet “Venera” missiyasına aiddir və 53 ildir ki, Yer ətrafında orbitdə qalıb.
Venüs üçün hazırlanıb, Yer atmosferində də sağ qala bilər
Sonda Venera atmosferinin sərt şəraitinə dözmək üçün hazırlanıb. Bu səbəbdən də onun Yer atmosferinə daxil olduqda tamamilə yanması ehtimalı azdır. Delft Texnologiya Universitetinin müəllimi Langbroek, “Bu cür aparat sərt şəraitə dözmək üçün dizayn edildiyindən, düşmə zamanı bütöv qalması mümkündür,” deyib.
Zondun içində paraşüt sistemi olsa da, onun bu qədər illərdən sonra işlək vəziyyətdə olub-olmadığı bilinmir. Əgər paraşüt aktivləşməzsə, aparat Yerə yüksək sürətlə — təxminən saatda 250 km — çırpıla bilər. Bu da meteor çarpmasına bənzər nəticələr doğura bilər.
Haraya düşəcəyi məlum deyil
Aparat təxminən 1 metr diametrində və 500 kiloqrama yaxın ağırlığa malikdir. Onun nə vaxt və hara düşəcəyi hələ dəqiq bilinmir. Langbroek-in sözlərinə görə, obyektin 51,7 dərəcə meylli orbit trayektoriyası onu 52° Şimal və 52° Cənub enlikləri arasında yerləşən istənilən nöqtəyə — Britaniya adalarından Yeni Zelandiyaya qədər — düşə biləcək bir vəziyyətə gətirir.
Langbroek bildirib ki, aparatın Yerə düşmə vaxtına dair təxminlər son aylar ərzində 9-10 may 2025 tarixlərini göstərir. “Düşmə tarixi yaxınlaşdıqca qeyri-müəyyənlik azalacaq, lakin o gün belə tam dəqiqliklə proqnozlaşdırmaq mümkün olmayacaq,” — deyə o əlavə edib.
Hazırda beynəlxalq izləyicilər zondun trayektoriyasını təqib edərək daha dəqiq məlumatlar əldə etməyə çalışırlar.