BAKI, AzerVoice
Kembric və Fudan universitetlərinin alimlərinin apardığı yeni elmi araşdırma, erkən yatmanın və uzunmüddətli yuxunun beyin fəaliyyətinə əhəmiyyətli dərəcədə müsbət təsir göstərdiyini ortaya qoyub.
Tədqiqatda 3200-dən çox yeniyetmə iştirak edib. Onların yuxu rejimi xüsusi fitnes qolbaqları vasitəsilə izlənilib, eyni zamanda MRT nəticələri və idrak qabiliyyətlərini ölçən testlər təhlil olunub.
Araşdırma nəticəsində məlum olub ki, erkən yataraq daha uzun müddət yatan yeniyetmələrin yaddaşı, düşünmə qabiliyyəti, dil ehtiyatı və problemləri həll etmə bacarığı daha yüksək olub.
Alimlər bildiriblər ki, yuxu müddətindəki cəmi 10–15 dəqiqəlik fərq belə, beynin inkişafında nəzərəçarpacaq rol oynayır.
Araşdırmaçılar yeniyetmələrə axşam saatlarında elektron cihazlardan istifadənin məhdudlaşdırılmasını, gündəlik fiziki aktivliyin artırılmasını və stabil yuxu rejiminə əməl olunmasını tövsiyə edirlər.