Bakı, AzerVoice

Şimali İrlandiyada tərk edilmiş barıt anbarının tavanında hörümçəyin bədəninə yerləşmiş, qorxu filmindən çıxmış kimi görünən yeni bir göbələk növü aşkar edilib.

AzerVoice xəbər verir ki, BBC-nin Winterwatch sənədli qrupu, nadir Metellina merianae mağara hörümçəyinin tanınmaz hala düşmüş cəsədini tapıb.

Nümunə Beynəlxalq Kənd Təsərrüfatı və Bioelm Mərkəzinin mikoloqu Harri Evansın rəhbərlik etdiyi qrupa göndərilib.

İrlandiyanın müxtəlif mağaralarından əlavə nümunələr toplayan alimlər göbələyin elm üçün yeni bir növ olduğunu müəyyən ediblər.

Tədqiqatçılar göbələyin M. merianae və Avropa mağara hörümçəyi Meta menardi üzərində inkişaf etdiyini müəyyən ediblər. Adətən torlarının yaxınlığında gizlənən bu hörümçəklər, göbələk yoluxduqdan sonra mağara tavanlarına doğru hərəkət edirlər.

Bu fenomen, Braziliyanın Atlantik tropik meşələrində Ophiocordyceps göbələyi ilə yoluxmuş qarışqaların "zombi" davranışına bənzəyir.

Alimlər hesab edirlər ki, göbələk hörümçəklərin sinir sistemini idarə edərək, onları daha açıq ərazilərə yönləndirir.

Genetik analizlər barıt anbarında və mağaralarda tapılan göbələk nümunələrinin eyni növə aid olduğunu göstərib. Lakin onların müxtəlif mühitlərdə fərqli formalara düşdüyü müşahidə edilib.

Hava axını olmayan barıt anbarında göbələk sporlarının sütunvari formalar aldığı və işığın olmaması səbəbindən rəngini itirdiyi qeydə alınıb. Mağaralarda isə hava axınları sporların yayılmasına kömək edir.

Tədqiqatçılar Uelsdə də oxşar göbələklərin aşkar edildiyini və yoluxmuş hörümçəklərin təkcə mağaralarda deyil, qayalı yarıqlarda və mamırla örtülmüş ərazilərdə də tapıldığını bildiriblər.