BAKI, AzerVoice
İsrail bu gün İordan çayının qərb sahilində 22 yeni yaşayış məntəqəsi inşa etmək niyyətindədir.
AzerVoice-un məlumatına görə, bu təşəbbüs yeni yaşayış məntəqələrinin tikintisini və icazəsiz salınmış məntəqələrin rəsmi şəkildə tanınmasını əhatə edəcək.
Bu qərarın İsrailin Yəhuda və Şomron üzərində nəzarətini gücləndirdiyini qeyd edən İsrailin müdafiə naziri İsrael Katz (o, bu adlarla Tövratda İordan çayının qərb sahilinə istinad edir - red.) bildirib: “Bu addım İsrail torpağındakı tarixi haqqımızı möhkəmləndirir və fələstinli terrorizminə verilmiş sarsıdıcı cavabdır.”
Kats həmçinin bildirib ki, bu qərar İsrail üçün təhlükə yarada biləcək Fələstin dövlətinin qurulmasının qarşısını almağa yönəlmiş strateji addımdır.
Qeyd edək ki, İsrail 1967-ci ildəki müharibə zamanı İordan çayının qərb sahilini işğal edib. Fələstinlilər isə bu ərazini gələcək dövlətlərinin əsas hissəsi kimi görürlər.
Əlavə edək ki, İsrail hal-hazırda bölgədə 100-dən çox yaşayış məntəqəsi salıb. Burada təxminən 500 min israilli məskunlaşıb. Bu yaşayış yerləri arasında təpələrin zirvəsində salınmış kiçik binalardan tutmuş, çoxmərtəbəli yaşayış kompleksləri, ticarət mərkəzləri, fabriklər və ictimai parklar yerləşən inkişaf etmiş yaşayış sahələri də var.
Məlumat üçün bildirək ki, İordan çayının qərb sahilində hazırda təxminən 3 milyon fələstinli yaşayır və bu ərazi İsrailin hərbi nəzarəti altında saxlanılır. Qərb ölkələrinin dəstəklədiyi Fələstin Muxtariyyəti bu bölgədəki əhalinin əsas mərkəzlərini idarə edir. Yaşayış məntəqələrində məskunlaşanlar isə İsrail vətəndaşlığı daşıyır.
Həmçinin qeyd edək ki, İsrail son illərdə, xüsusilə 2023-cü ilin 7 oktyabr tarixində HƏMAS tərəfindən başladılan və Qəzza müharibəsinə səbəb olan hücumdan əvvəl də yaşayış məntəqələrinin inşasını sürətləndirmişdi.
