BAKI, AzerVoice

Bu gün İsrail ordusu Qəzza zolağının cənubunda yerləşən Xan Yunis şəhərinin müxtəlif bölgələrində məcburi köçkünlərin düşərgələrinə hava zərbələri endirib.

AzerVoice xəbər verir ki, bu barədə Fələstin mətbuatı məlumat yayıb.

Məlumata görə, hava zərbələri nəticəsində 4-ü uşaq olmaqla 10 fələstinli həlak olub.

Digər bir hücumda isə İsrailin pilotsuz uçuş aparatı (PUA) Xan Yunisin şimalındakı Əl-Mavasi bölgəsində başqa bir köçkün çadırını vurub. Bu hücum da bir ailənin – ata, ana və iki uşağın həlak olması ilə nəticələnib.

Eyni zamanda Xan Yunisin cənubundakı 19-cu quyu bölgəsi yaxınlığında yerləşən çadırın bombalanması nəticəsində bir yeniyetmə həlak olub. Şimal-qərbdəki Əl-Qarara bölgəsində “Sərhədsiz Həkimlər” təşkilatının qərargahı yaxınlığında bir velosipedə endirilən hücum isə başqa bir fələstinlinin ölümünə səbəb olub.

Mənbələrin məlumatına görə, İsrail artilleriyası Xan Yunisin şərqində yerləşən Əbəsan əl-Kəbirə qəsəbəsini də hədəf alıb və bu, İsrail ordunun zirehli texnikasından həyata keçirdiyi intensiv atəşlərlə müşayiət olunub.