BAKI, AzerVoice
HƏMAS Qəzza zolağında atəşkəs sazişi imzalamağa hazır olduğunu təsdiqləyib.
AzerVoice xəbər verir ki, bu barədə HƏMAS-ın nümayəndəsi Əbdürrəhman Şədid bəyanatla çıxış edib.
“HƏMAS İsrailli girovların fələstinli məhbuslarla dəyişdirilməsi üzrə razılaşmaya hazır olduğunu təsdiqləyir və bu istiqamətdə hərtərəfli təklifini artıq təqdim edib. Lakin İsrail danışıqların uğurla nəticələnməsinə mane olur – indi top onların meydançasındadır” - deyə, o çıxışında bildirib.
HƏMAS həmçinin təsdiqləyib ki, İsraillə əldə ediləcək razılaşma çərçivəsində Qəzzada beş illik atəşkəsin təmin olunmasını təklif edib.
“17 aprel tarixində biz razılaşmaya dair təklif təqdim etdik. Bu təklifdə beynəlxalq səviyyədə zəmanət altına alınacaq beş illik atəşkəsin imzalanması da nəzərdə tutulurdu. Lakin İsrailin baş naziri Benyamin Netanyahunun hökuməti bu təklifi rədd etdi və döyüşlərin dayandırılmasından imtina etdi” – deyə, Şədid vurğulayıb.
