Bakı. AzerVoice:
Fələstinin xarici işlər naziri Riyad əl-Maliki bildirib ki, İsrailin baş naziri Benyamin Netanyahu atəşkəs əldə etmək istəmir, o cümlədən gənc və yaşlı fərq etmədən fələstinliləri, qadınları və uşaqları öldürməyə davam etmək istəyir.
AzerVoice-un məlumatına görə, İsrailin Qəzzaya hücumlarına diqqət çəkən Maliki dinc insanların öldürülməsinə qarşı olduqlarını bildirib.
Maliki girovların azad edilməsi, uzun illər İsrail həbsxanalarında olan fələstinli əsirlərin dəyişdirilməsi və atəşkəs imkanlarının yaradılmasına müsbət yanaşacaqlarını ifadə edərək, girovların azad edilməsinin həm də “atəşkəs” mənasına gələcəyini bildirib.
Atəşkəs əldə olunarsa, humanitar yardımların Qəzzanın cənubu ilə yanaşı şimalına da daxil olmasının mümkün olacağını vurğulayan Maliki qeyd edib ki, bunun ən qısa zamanda baş verəcəyini ümid edirik.
Maliki, atəşkəsin daimi olmasının Qəzzanın necə yenidən inşa ediləcəyi barədə də düşünmək imkanı verəcəyini bildirib.
ABŞ, Qətər, Misir və İsrail arasında razılığa gəlmək üçün son bir aydır danışıqların davam etdiyini qeyd edən Maliki, bunun ən qısa zamanda həyata keçirilməsi ehtimalının olduğunu eşitdiklərini bildirib.
Yanvarın 26-da Beynəlxalq Ədalət Məhkəməsinin (ICJ) İsrailə qarşı tətbiq etdiyi ehtiyat tədbirlərinin İsrail kimi hər kəs üçün keçərli olduğunu xatırladan Maliki vurğulayıb ki, İsrail bu ehtiyat tədbirlərinə əməl etməzsə, bunun əvəzini ödəyəcək.
Qeyd edək ki, İsrailin 7 oktyabrdan bəri Qəzza zolağına təşkil etdiyi hücumlarda ən az 12 min 660-ı uşaq, 8 min 570-i qadın olmaqla, 30 min fələstinli həlak olub, 70 min nəfər isə yaralanıb.
Dağıntılar altında hələ də minlərlə ölü olduğu bildirilərkən, insanların sığındığı xəstəxana və təhsil müəssisələri hədəf alınaraq mülki infrastruktur da məhv edilir.
Qəzzada 1,9 milyon fələstinli havadan, qurudan və dənizdən edilən hücumlar səbəbilə didərgin düşüb.
İsrailin maneələri səbəbindən bölgəyə kifayət qədər yardım çatdırıla bilmir. Fələstinlilər bir tərəfdən İsrailin hücumları ilə, digər tərəfdən isə hər gün dərinləşən aclıqla mübarizə aparır.