BAKI, AzerVoice
Türkiyə Prezidenti Rəcəb Tayyib Ərdoğan və ABŞ Prezidenti Donald Tramp arasındakı görüş kifayət qədər konstruktiv və faydalı keçib.
AzerVoice xəbər verir ki, bu barədə Türkiyənin xarici işlər naziri Hakan Fidan, "A Haber" kanalına verdiyi müsahibədə bildirib.
Fidan bildirib ki, Ərdoğan və Tramp arasında keçirilən görüş əvvəldən planlaşdırılmışdı. Onun sözlərinə görə, iki lider uzun müddətdir əlaqədə idi və bu görüş, bu münasibətlərin davamı olaraq reallaşdı. Görüş NATO Sammiti çərçivəsində keçirilib və əsas müzakirə mövzuları Qəzzədə baş verən hadisələr, İran-İsrail gərginliyi, qlobal və regional məsələlər olub.
Nazir, NATO-ya üzv ölkələrin qarşıdakı 10 il ərzində müdafiə xərclərini ümumi daxili məhsulun 5 faizinə qədər artırmaq barədə razılığa gəldiklərini qeyd edib. Onun fikrincə, bu qərar beynəlxalq təhlükəsizlik balansını dəyişəcək və ABŞ ilə Avropa arasındakı strateji asılılıq münasibətlərini ABŞ-ın xeyrinə yönəldəcək. Fidan, Trampın da bu istiqamətdə israrlı olduğunu bildirib.
