BAKI,AzerVoice

ABŞ-ın keçmiş prezidenti Barak Obamanın podkastların birində yadplanetlilərin mövcudluğu ilə bağlı verdiyi bəyanat böyük səs-küyə səbəb olduqdan bir neçə saat sonra, o, bir bəyanat yayaraq onların varlığına dair heç bir sübut görmədiyini aydınlaşdırıb. Həftəsonu amerikalı aparıcı Brayan Tayler Koen ilə söhbət zamanı, qısa sual-cavab turunda Obamanın yadplanetlilərin varlığını təsdiqləmişdi. "Yadplanetlilər realdırmı?" sualına Obama belə cavab vermişdi: "Onlar realdır, lakin mən onları görməmişəm."

Daha sonra o əlavə etmişdi: "Onlar 'Zona 51'-də (Area 51) saxlanılmırlar. Əgər ABŞ prezidentindən gizlədilən bir sirr yoxdursa, orada heç bir yeraltı obyekt mövcud deyil."

Bu bəyanat dünən dünya mediasında sürətlə yayıldı və "Barak Obama yadplanetlilərin real olduğunu deyir", "Obama yadplanetlilər haqqında şok açıqlamaları ilə mübahisə yaradır" kimi başlıqlarla tirajlandı. "Time" jurnalı da bu mövzunu "Obama yadplanetlilərin real olduğunu deyir, lakin onlar Zona 51-də deyillər" başlığı ilə işıqlandırdı.

Media fırtınasından sonra Obama bazar günü axşam "Instagram" hesabında yeni bir bəyanat yayaraq, "Mən qısa müzakirə ruhuna sadiq qalmağa çalışırdım, lakin mövzu bu qədər diqqət çəkdiyi üçün aydınlıq gətirmək istəyirəm. Statistik olaraq, kainat o qədər genişdir ki, orada həyatın mövcudluq ehtimalı yüksəkdir. Lakin günəş sistemləri arasındakı məsafələr o qədər böyükdür ki, yadplanetlilərin bizi ziyarət etmə ehtimalı çox azdır. Prezidentliyim dövründə yadplanetlilərin bizimlə təmasa keçməsinə dair heç bir sübut görməmişəm. Həqiqətən!"-dedə bildirdi.

Zona 51 və "UFO" həqiqətləri

Britaniyanın "The Guardian" qəzetinin qeyd etdiyi kimi, uzun müddətdir ABŞ hökumətinin Nevada ştatındakı gizli hərbi bazada yadplanetliləri gizlətdiyi barədə sui-qəsd nəzəriyyələri mövcuddur. 2019-cu ildə 1,5 milyon insan obyekti "ələ keçirmək" üçün qeydiyyatdan keçsə də, sonda bu cəhd musiqi festivalına çevrilmişdi.

2013-cü ildə məxfiliyi ləğv edilmiş sənədlər üzə çıxardı ki, bu gizli baza əslində ABŞ hökumətinin "U-2" və "Oxcart" kimi hava kəşfiyyat layihələrini sınaqdan keçirmək üçün istifadə olunub. Sənədlərdə qeyd olunurdu: "U-2 təyyarəsinin yüksək hündürlükdə sınaqları gözlənilməz bir yan təsirə — Naməlum Uçan Obyektlər (UFO) barədə hesabatların kəskin artmasına səbəb oldu."

Tramp və "Açılış dövrü"

Obamanın bu çıxışı, bir sənədli film rejissorunun Donald Trampın tezliklə yadplanetlilərin varlığını təsdiqləyə biləcəyinə dair eyhamlarından aylar sonraya təsadüf edir. "Açılış dövrü" (Age of Disclosure) filminin rejissoru Dan Fərəh: "Hesab edirəm ki, prezidentin kürsüyə qalxıb 'Kainatda tək deyilik' deməsi yalnız zaman məsələsidir."- deyə bildirmişdi.