BAKI, AzerVoice, Nailə Babazadə

Türkiyə Daxili İşlər Naziri Ali Yerlikaya, dünən gecə Ankarada baş verən təyyarə qəzası ilə bağlı açıqlama verib.

AzerVoice xəbər verir ki, Nazir bildirib ki, Liviya heyətini daşıyan təyyarə texniki problem barədə məlumat verdikdən sonra qəzaya uğrayıb.

“Saat 21:32-də texniki nasazlıq səbəbindən geri dönəcəyi bildirildi. Lakin saat 21:52-də Haymana ərazisində təyyarə ilə əlaqə tamamilə kəsildi.” - deyə Yerlikaya qeyd edib.

Hadisə yerinə dərhal AFAD, Polis, Sağlamlıq və UMKE əməkdaşları göndərilib. Axtarış-xilasetmə işləri Nəqliyyat və İnfrastruktur Nazirliyi ilə Hərbi Hava Qüvvələri Komandanlığı koordinasiyasında aparılıb.

Təyyarənin dağıntıları, Haymana rayonunun Kesikkavak qəsəbəsindən təxminən 2 km cənubda tapılıb. Sahədə idarəetmə AFAD Mobil Koordinasiya Mərkəzi vasitəsilə həyata keçirilir. Ümumilikdə 408 nəfər heyət, 103 texniki vasitə və 7 hava vasitəsi əməliyyatlarda iştirak edir; dronlar və termal kameralar ilə ərazidən canlı görüntü ötürülür.

Nazir bildirib ki, təyyarəyə aid səs yazma cihazı saat 03:45-də, qaraqutu isə saat 04:20-də tapılıb və onların təhlili müvafiq qurumlar tərəfindən başlanıb.

Liviya tərəfindən göndərilən 22 nəfərlik heyət artıq Ankaraya çatdırılıb. Ali Yerlikaya qəza nəticəsində dünyasını dəyişənlərə Allahdan rəhmət, ailələrinə və Liviya xalqına başsağlığı verib.