BAKI, AzerVoice, Orxan Qədirzadə

Türkiyə Prezidenti Rəcəb Tayyib Ərdoğanın həyat yoldaşı Əminə Ərdoğan Beynəlxalq İnsan Hüquqları Günü münasibətilə Türkiyənin NSosyal platformasında paylaşım edib. AzerVoice xəbər verir ki, Əminə Ərdoğan paylaşımında Fələstin xalqının yaşadığı acının beynəlxalq ictimaiyyət üçün ədalət axtarışını daha da vacib etdiyini bildirib.

Əminə Ərdoğan qeyd edib ki, insan ləyaqəti hüququ hər bir fərdin doğuşdan sahib olduğu ən fundamental haqqdır. Onun sözlərinə görə, 10 dekabr insan hüquqlarının pozulduğu bütün yerlər üçün vicdana çağırışdır.

Paylaşımında o, Fələstin xalqının torpağından uzaq düşməsi, azadlığından məhrum edilməsi və ən elementar hüquqlara çıxışının olmamasını xatırladaraq, bunun beynəlxalq aləmdə ədalət tələblərini daha da gücləndirdiyini vurğulayıb.

“Fələstin xalqının ağrısı dünyanı daha çox ədalət axtarmağa vadar edir. Biz bilirik ki, ədalətli dünya mümkündür. Bunun üçün insanın başqasının ağrısına biganə qalmaması və haqqın gücdən deyil, həqiqətdən doğması kifayətdir.”

Əminə Ərdoğan paylaşımına insan hüquqları mövzusunda çıxışlarından görüntülər və Qəzza zolağında baş verən hücumlara dair kadrların yer aldığı videomaterial da əlavə edib.