BAKI, AzerVoice, Fərid Mikayılov

İsrailin ABŞ-dakı səfiri Yexiel Leiter Türkiyənin F-35 döyüş təyyarələri tədarükü məsələsində İsrailin mövqeyini açıqlayaraq, ölkəsinin bu mövzuda qətiyyətli olduğunu bildirib.

AzerVoice xəbər verir ki, Leiter Türkiyənin strateji əhəmiyyətini və NATO üzvü olaraq güclü orduya malik olduğunu tanıdığını vurğulayıb, lakin İsrailin Türkiyənin ABŞ-dan F-35 almasını istəmədiyini qeyd edib.

“Hazırda bunun konstruktiv olduğunu düşünmürük. ABŞ da qərarını buna uyğun verəcək”- deyə o bildirib.

Diplomat iki ölkə arasında fərqliliklərə baxmayaraq hər hansı bir böhran yaşanmadığını qeyd edib.

Leiter həmçinin Türk hərbçilərinin Qəzza və Suriya bölgəsində xidmət etməsini qəbul etmədiklərini bildirib və ABŞ tərəfindən bu tələblərin sorğulanmadığını vurğulayıb.

Qeyd edək ki, Türkiyə əvvəllər F-35 Proqramında sənaye tərəfdaşı olmuşdur. Lakin S-400 hava hücumundan müdafiə sistemini aldıqdan sonra proqramdan çıxarılmış və üzərinə embarqo tətbiq edilmişdir. Türk Hərbi Hava Qüvvələri üçün istehsal olunan F-35A təyyarələri isə 2018-ci ildən bəri ABŞ-da saxlanılır.