BAKI, AzerVoice, Nailə Babazadə

Türkiyənin xarici işlər naziri Hakan Fidan İordaniya xarici işlər naziri Əymən əs-Safedi və Misir xarici işlər naziri Bədr Abdulati ilə telefon danışığı aparıb.

AzerVoice xəbər verir ki, Türkiyə XİN- dən verilən məlumata görə, danışıqlar zamanı Qəzzaya humanitar yardımın fasiləsiz şəkildə çatdırılması, bölgədə davam edən humanitar böhranın yüngülləşdirilməsi və atəşkəsin qalıcı hala gətirilməsi üçün görülən işlər müzakirə olunub.

Tərəflər həmçinin regional sabitliyin qorunması, mülki əhalinin qorunması və beynəlxalq ictimaiyyətin Qəzzadakı vəziyyətə qarşı daha təsirli addımlar atmasının vacibliyini vurğulayıblar.

Nazir Fidan Türkiyənin Qəzzada davam edən humanitar faciənin dayandırılması və bölgəyə yardımların maneəsiz çatdırılması üçün diplomatik səylərini davam etdirdiyini bildirib. O, həm İordaniya, həm də Misirlə bu istiqamətdə sıx əməkdaşlığın əhəmiyyətini qeyd edib.

Qarşılıqlı fikir mübadiləsi zamanı tərəflər gələcək günlərdə regiondakı vəziyyətin sabitləşdirilməsi və humanitar dəstəyin artırılması üçün əlaqələrin davam etdirilməsində razılaşıblar.