BAKI, AzerVoice, Orxan Qədirzadə

Türkiyə Qəzza missiyasında iştirak üçün ABŞ-dən təminat istəyib

AzerVoice xəbər verir ki, Qəzza zolağında atəşkəs və sülh prosesinə dair diplomatik təşəbbüslərin mərkəzində Türkiyə ordusunun mümkün iştirakı müzakirə olunur. Məlumata görə, Türkiyə beynəlxalq barış missiyasına qoşulmaq üçün ABŞ-dən İsrail qüvvələri ilə birbaşa təmasdan çəkinmək barədə təminat tələb edib.

Həmçinin İndoneziya da bu missiyanın sırf “barış gücü” statusunda qalacağı və İsrail qüvvələri ilə toqquşma yaşanmayacağı barədə təminat istəyib.

Təl-Əviv administrasiyası barış missiyasının fəaliyyətindən əvvək itkin düşmüş şəxslərin və cəsədlərin qaytarılması prosesinin tam başa çatdırılmasını tələb edib.

ABŞ administrasiyası isə Fələstin müqavimət qruplarının mərhələli şəkildə silahsızlaşdırılmasını tələb edir, lakin bu proses üçün konkret vaxt cədvəli açıqlamaqdan çəkinir. Vaşinqtonun məqsədi həm siyasi çevikliyi qorumaq, həm də HƏMAS-la birbaşa qarşıdurmadan yayınmaqdır.

Misir rəhbərliyi də prosesə ehtiyatla yanaşır. Qahirə, HƏMAS infrastrukturunun tam məhv edilməsini və ya İsrail əvəzinə döyüşəcək beynəlxalq qüvvənin bir hissəsi olmağı qəbul etmir. Misirin iştirak üçün üç əsas şərti var: açıq beynəlxalq razılaşma, səlahiyyətlərin məhdud şəkildə müəyyən edilməsi və İsrail qüvvələrinin bu mexanizmlə birgə hərəkət etməməsi.

Səudiyyə Ərəbistanı isə “ertəsi gün” planı çərçivəsində Fələstin İdarəsinin gücləndirilməsini və HƏMAS-ın mərhələli şəkildə neytrallaşdırılmasını təklif edir. Riyad, 1967 sərhədləri daxilində paytaxtı Şərqi Qüds olan müstəqil Fələstin dövlətinin qurulmasını daimi həllin əsası kimi görür.

Səudiyyə tərəfi, həmçinin BMT nəzarətində beynəlxalq barış qüvvəsinin Qəzza zolağında yerləşdirilməsini və keçid dövründə bu qüvvə ilə Fələstin İdarəsi arasında sıx əməkdaşlıq yaradılmasını dəstəkləyir.