BAKI, AzerVoice, Nailə Babazadə
NATO-nun Baş katibi Mark Rutte Qəzzada əldə olunan atəşkəs razılaşmasındakı roluna görə Türkiyəyə təşəkkürünü bildirib.
AzerVoice xəbər verir ki, Sloveniyada keçirilən NATO Parlament Assambleyasının (PA) iclasında çıxış edən Rutte, Türkiyə Böyük Millət Məclisinin NATO PA Türk nümayəndə heyətinin sədri, Ədalət və İnkişaf Partiyasının (AK Partiya) Antalya deputatı Mövlud Çavuşoğlunun İsrailin bölgədə və Qəzzada həyata keçirdiyi hücumların NATO-nun ümumi təhlükəsizlik mühitinə təsiri ilə bağlı sualını cavablandırıb.
Sözlərinə Qəzzədə əldə olunan atəşkəsə verdiyi töhfəyə görə Çavuşoğlu vasitəsilə Türkiyəyə təşəkkür etməklə başlayıb.
“Bundan əlavə, atəşkəsin həyata keçməsi münasibətilə ABŞ-a, Misirə və Qətərə də təşəkkür edirəm.” - deyə Rutte qeyd edib.
Rutte bildirib ki, Türkiyə Prezident Rəcəb Tayyib Ərdoğan və onun komandası Qəzza məsələsində ABŞ, Misir və Qətərlə çox intensiv şəkildə işləyib.
“Bu inkişafın (atəşkəsin) baş verməsi böyük addımdır və ümid edirəm ki, bu, Avropada və ABŞ-la birlikdə Ukraynaya qarşı aparılan bu dəhşətli müharibəni bitirmək üçün əlimizdən gələni etməyimizə ilham verəcək.” - deyə Rutte qeyd edib.
Rutte NATO-nun Avropa-Atlantik bölgəsində fəaliyyət göstərdiyini və İsrail mövzusunun “ittifaq ərazilərinin bir qədər xaricində qaldığını” söyləyib.
“Bu, İraqdakı missiyamızla bağlı məsələdir. Bu arada Türkiyə burada böyük rol oynayır. O, hələ də iraqlıların öz təhlükəsizlik və müdafiə qüvvələrini inkişaf etdirmələrinə kömək edir.”
Rutte Avropa İttifaqının (Aİ) müdafiə sahəsindəki layihələrinin Aİ-yə üzv olmayan müttəfiqlər üçün də “açıq və şəffaf” olması gərəkdiyini bildirib.