BAKI,AzerVoice, Fərid Mikayılov

Rəcəb Tayyib Ərdoğan Qəzzada atəşkəs sonrası bölgədə sülhün təmin olunmasının vacibliyini vurğulayıb.

AzerVoice xəbər verir ki, Ərdoğan bildirib ki, bölgəmiz, xüsusilə Qəzza, artıq qan, qırğın və gözyaşına doymuşdur və sülhə imkan verilməlidir.

Ərdoğan vurğulayıb ki, Türkiyə prosesin ilk günündən etibarən bölgədə sülhün təmin olunmasına ən böyük töhfəni verən ölkələrdən biridir. Ərdoğan, ABŞ Prezidenti ilə Nyu-York və Vaşinqtonda keçirilən məhsuldar görüşlərdən, HƏMAS-la aparılan əhatəli danışıqlardan və Qətər, Misir, Səudiyyə Ərəbistanı, Birləşmiş Ərəb Əmirlikləri ilə həyata keçirilən təmaslardan danışıb.

Ərdoğan həmçinin bildirib ki, Türkiyə bütün imkanlarını, diplomatlarını və kəşfiyyat resurslarını səfərbər edərək, Qəzzada bir gün də olsun günahsız insan ölməməsi üçün hərəkət edib və nəticədə razılaşmanın imzalanması ilə davamlı sülh yolunun açıldığını vurğulayıb.

“Misirin El-Ariş limanında gözləyən gəmilərimizdəki yardımları sürətlə Qəzzaya çatdıracağıq. Hava soyumadan əhalinin ehtiyaclarını qarşılamaq önəmlidir”- deyə o bildirib.

O, çıxışını Qəzza əhalisinə dəstək mesajı ilə yekunlaşdırıb.

“Türkiyə olaraq bundan sonra da bütün imkanlarımızla Fələstinli qardaşlarımızı dəstəkləməyə davam edəcəyik”- deyə Türkiyə lideri bildirib.