BAKI, AzerVoice, Nailə Babazadə
Türkiyədə müdafiə sənayesinin inkişafı və texnoloji transformasiyasında aparıcı rol oynayan ASELSAN, maliyyə göstəriciləri ilə də diqqət mərkəzinə düşür. Şirkət, Borsa İstanbul indeksinə daxil olan şirkətlər arasında bazar dəyəri 1 trilyon Türkiyə lirəsini keçən ilk şirkət olub.
AzerVoice xəbər verir ki, hazırda qlobal maliyyə bazarlarında risklərin azalması və ABŞ Federal Ehtiyat Sisteminin (FED) faiz endirimi dövrünə qayıtması, investorların risk iştahını artırıb. Türkiyədə isə Mərkəzi Bankın faiz endirimi siyasəti və iqtisadi idarəetmədə atılan addımlar, Borsa İstanbul-un yüksəlişini gücləndirib.
Bu mühitdə, ixracat yönümlü strategiya izləyən ASELSAN-ın performansı xüsusilə fərqlənib. Şirkətin səhmlərinin qiyməti 2024-cü ilin əvvəlində 72,50 lirədən ticarətə başlayıb, sonrakı aylarda artan tendensiyanı qoruyaraq 220,80 lirəyə yüksəlib. Nəticədə ASELSAN, BIST 100 indeksinə daxil olan şirkətlər arasında ilk dəfə 1 trilyon lirə bazar dəyərinə çatıb.
İqtisadi artım, inflyasiyanın azalması və xarici siyasətdə atılan addımların da bazara müsbət təsir göstərdiyi qeyd olunur. BIST 100 indeksi 26 avqust tarixində 11.605,30 bəndlə tarixi rekord səviyyəyə çatıb.
