BAKI, AzerVoice, Nailə Babazadə
Türkiyənin ilk yerli pilotsuz döyüş təyyarəsi Bayraktar KIZILELMA dünyada bir ilke daha imza atıb. Təyyarəyə, ən inkişaf etmiş 5-ci nəsil döyüş təyyarələrində mövcud olan Aşağı Görünürlüklü Elektro-Optik Hədəfləmə Sistemi TOYGUN uğurla inteqrasiya edilib və bu, ilk dəfə olaraq bir pilotsuz döyüş təyyarəsində tətbiq olunub.
AzerVoice xəbər verir ki, Baykar şirkətinin tamamilə milli resurslarla hazırladığı Bayraktar KIZILELMA, Türkiyəni havacılıqda yeni bir səviyyəyə çıxaracaq kritik bacarığı da sınaqdan keçirib. Təyyarənin inkişafı planlaşdırıldığı kimi davam edir və platformaya ASELSAN tərəfindən hazırlanan TOYGUN Elektro-Optik Hədəfləmə Sistemi tamamilə yerli imkanlarla inteqrasiya olunub.
TOYGUN sistemi, ASELSAN-ın infraqırmızı bantda ən inkişaf etmiş məhsulu olaraq Bayraktar KIZILELMA-ya sahədə böyük üstünlük təmin edir. Testlər Çorludakı AKINCI Uçuş Təlim və Test Mərkəzində həyata keçirilib və sistem yüksək performans nümayiş etdirib. Fərqli yüksəklik və sürət rejimlərində stabil görüntü, uzun məsafəli hədəf izləmə və lazerlə hədəfləmə funksiyaları yüksək dəqiqliklə təsdiqlənib.
Bu testlər həm də sistemin Bayraktar KIZILELMA-nın inteqrə edilmiş tapşırıq kompüteri ilə fasiləsiz məlumat mübadiləsi edə bildiyini və çətin ətraf mühit şərtlərində belə performansını qoruduğunu göstərib. Eyni zamanda, bu testlər dünyada ilk dəfə gövdə daxilində yerləşdirilmiş EOTS (Embedded Electro-Optic Targeting System) texnologiyasının pilotsuz döyüş təyyarəsində uğurla tətbiq edildiyini təsdiqləyib.
Korpus daxilində yerləşdirilmiş bu sistem yalnız ABŞ-ın F-35 kimi 5-ci nəsil təyyarələrində mövcuddur. Bayraktar KIZILELMA-ya bu texnologiyanın uğurla inteqrasiyası ilə Türkiyə bu bacarığa sahib dünyadakı üç ölkədən biri olub.
TOYGUN sistemi Bayraktar KIZILELMA üçün xüsusi optimallaşdırılıb, 360° tarama qabiliyyəti ilə yüksək dəqiqlikli infraqırmızı görüntüləmə təmin edir və uzun məsafədən strateji hədəfləri, hərəkətli quru və dəniz hədəflərini aşkarlaya bilir. Eyni zamanda, süni intellekt dəstəyi ilə avtomatik hədəf izləmə və təsnifat alqoritmləri təyyarənin otonom gücünü artırır.
Bu xüsusiyyətlər Bayraktar KIZILELMA-nın düşmən ərazilərinə radara görünmədən sızmasını, hədəfləri aşkarlamasını, lazerlə işarələməsini və milli silahlarla məhv etməsini təmin edir.