BAKI, AzerVoice, Səməd Əyyubov
Türkiyənin Xarici İşlər Nazirliyi İsrailin Dohadakı HƏMAS liderlərini hədəf aldığı hücumu pisləyib.
AzerVoice xəbər verir ki, bu barədə nazirliyin yaydığı bəyanatda deyilir.
“İsrailin Qətərin paytaxtı Dohada HƏMAS-ın danışıqlar heyətinə qarşı həyata keçirdiyi hücumu qətiyyətlə lənətləyirik. Atəşkəs danışıqları davam edərkən HƏMAS müzakirə heyətinin hədəf alınması, İsrailin müharibəni davam etdirmək niyyətində olduğunu göstərir" - deyə, bəyanatda vurğulanıb.
Həmçinin qeyd olunub ki, bu vəziyyət İsrailin bölgədəki ekspansionist siyasətinin və terrorizmi dövlət siyasəti kimi qəbul etdiyinin açıq sübutudur.
"Suverenliyi və təhlükəsizliyi hədəf alan bu hücum qarşısında biz Qətərin yanındayıq” - deyə, bəyanatda bildirilib.
Qeyd edək ki, “Əl-Cəzirə” telekanalı HƏMAS-dakı mənbələrə istinadən bildirib ki, Xəlil əl-Həyyənin başçılıq etdiyi nümayəndə heyəti İsrailin Dohaya təşkil etdiyi sui-qəsd cəhdindən xilas olub.
