BAKI, AzerVoice, Səməd Əyyubov
Türkiyədə vəzifəsindən uzaqlaşdırılan Beykoz Bələdiyyə Başçısı Alaattin Köseler barəsində yenidən həbs qərarı verilib.
AzerVoice-un məlumatına görə, məhkəmə prokurorluğun onun azadlığa buraxılması ilə bağlı qərara etirazını qəbul edib.
Prokurorluq Köselerlə yanaşı Veli Gümüş, Serdar Karahan, Havva Dindar və Uğur İnci barədə də azadlığa buraxılma qərarına etiraz edərək onların həbsini tələb edib.
Köselerin də aralarında olduğu, 13-ü həbsdə olmaqla ümumilikdə 26 nəfər barəsində “tenderə müdaxilə” və “cinayət məqsədilə təşkilat qurmaq, üzvlük və yardım göstərmək” ittihamları üzrə aparılan istintaqda, Köseler üçün 17 il 6 aydan 67 il 3 aya qədər həbs cəzası istənilib. Digər 25 təqsirləndirilən şəxs üçün də müxtəlif ittihamlarla fərqli müddətlərdə həbs cəzaları tələb olunub.
Qeyd edək ki, Köselerin də daxil olduğu 13 nəfər təqsirləndirilən daha əvvəl azadlığa buraxılmışdı. Lakin Anadolu Respublika Baş Prokurorluğu bu qərara etiraz edib. Prokurorluğun müraciəti 18-ci Ağır Cəza Məhkəməsi tərəfindən qəbul olunaraq, Alaattin Köselerin yenidən həbsinə qərar verilib.
