BAKI, AzerVoice, Nərmin Ağayeva
Türkiyə Prezidenti Rəcəb Tayyib Ərdoğan Qəzzadakı humanitar fəlakəti bəşəriyyətin ümumi məsuliyyəti kimi qiymətləndirib.
AzerVoice xəbər verir ki, Ərdoğanın Yaponiyanın aparıcı qəzetlərindən olan “Nikkei Shimbun”da yapon və ingilis dillərində dərc olunan məqaləsində Qəzza böhranı və Türkiyə-Yaponiya əməkdaşlığına dair mühüm mesajlar verilib.
Kommunikasiyalar Direktoru Burhanəddin Duranın sosial media paylaşımında bildirdiyinə görə, Ərdoğan məqaləsində Türkiyə ilə Yaponiya arasındakı dostluğun yalnız rəsmi sənədlərlə deyil, həm də ortaq vicdan, humanitar yardımlar və tarixi xatirələrlə qidalanan dərin bir bağ olduğunu qeyd edib.
Ərdoğan, Türk qətiyyəti ilə Yapon mühəndisliyinin birləşərək Marmaray, Osmanqazi körpüsü, Boğaziçi və Haliç körpüləri kimi layihələrdə əməkdaşlıq etdiyini, bu əməkdaşlığın etimad, səmimiyyət və sevgi bağı ilə möhkəmləndiyini vurğulayıb. O, Türkiyə-Yaponiya əməkdaşlığının qlobal böhranlar qarşısında konstruktiv həllər təklif edə biləcəyini, xüsusilə TİKA və JICA-nın birgə layihələrinin humanitar diplomatiyada mühüm rol oynadığını bildirib.
“İsrailin soyqırımı və işğalı nəticəsində uşaqlar aclıqdan əziyyət çəkir, xəstəxanalar fəaliyyətsizdir, şəhərlər xarabalığa çevrilib, milyonlarla insan əsas ehtiyaclarından məhrumdur. Bu faciə bütün bəşəriyyətin məsələsidir.” - deyə Ərdoğan Qəzza ilə bağlı çağırış edib. Türkiyənin bu məsələdə susmadığını və susmayacağını qeyd edən Ərdoğan, atəşkəs, humanitar yardımlara maneəsiz çıxış və günahsız mülki şəxslərin müdafiəsi üçün hər platformada mübarizə apardıqlarını vurğulayıb. O, Yaponiyanın sülhə üstünlük verən müdrikliyinin və beynəlxalq hüquqa sadiqliyinin bu prosesdə əvəzsiz olduğunu, Türkiyənin regional təsiri ilə birləşdikdə güclü bir tərəfdaşlıq yarada biləcəyini qeyd edib.
Qeyd edək ki, Qəzza böhranı uzun müddətdir beynəlxalq gündəmin əsas mövzularından biridir. İsrailin hərbi əməliyyatları nəticəsində bölgədə humanitar vəziyyət ağırlaşmış, minlərlə insan həyatını itirmiş və milyonlarla insan evini tərk etmək məcburiyyətində qalmışdır. Türkiyə bu böhrana qarşı aktiv mövqe sərgiləyərək, beynəlxalq ictimaiyyəti hərəkətə keçməyə çağırır.