BAKI, AzerVoice, Nərmin Ağayeva
Türk Hava Yollarına məxsus təyyarələr 89 təhlükəsizlik yoxlamasından uğurla keçib.
AzerVoice xəbər verir ki, Türk Hava Yollarının (THY) təyyarələri son 12 ayda 36 ölkədə 61 hava limanında aparılan 89 təhlükəsizlik yoxlamasından uğurla çıxıb.
THY-nin baş direktoru Bilal Ekşi sosial media hesabında bildirib ki, SAFA proqramı çərçivəsində yoxlamalar zamanı 0,378 nisbətində “yoxluq göstəricisi” qeydə alınıb və bu, yüksək nəticə sayılır. Onun sözlərinə görə, sərnişinlərin rahat və təhlükəsiz uçuşu üçün bütün qaydalara ciddi şəkildə əməl olunur.
Qeyd edək ki, SAFA (“Xarici təyyarələrin təhlükəsizliyinin qiymətləndirilməsi”) Avropa Birliyi ölkələrində tətbiq olunan proqramdır və beynəlxalq uçuş təhlükəsizliyi tələblərinə uyğunluğu yoxlamaq məqsədi daşıyır. Yoxlamalar təyyarələrin texniki vəziyyəti, kokpit və kabinə standartları, həmçinin sərnişinlərin təhlükəsizliyinin təmin olunması ilə bağlı tələbləri əhatə edir.
