BAKI, AzerVoice, Nailə Babazadə

İspaniya hökuməti, Türkiyənin ilk milli reaktiv təlim və yüngül hücum təyyarəsi HÜRJET-in alınmasına rəsmi olaraq razılıq verib.

AzerVoice xəbər verir ki, qərar, İspaniya Nazirlər Şurasının 28 oktyabr tarixli iclasında təsdiqlənib.

"Nazirlər Şurası, mövcud AE.09 (F-5) təyyarələrinin yerinə döyüş və hücum təyyarələri üçün Enteqrə Təlim Sistemi (ITS-C) alınmasını, dəyəri təxminən 3 milyard 120 milyon avro olan müqavilə çərçivəsində təsdiqləyib." - deyə bəyanatda qeyd edilib.

Qərara əsasən, İspaniya Türkiyədən 45 ədəd HÜRJET təyyarəsi alacaq. Sənəddə qeyd olunur ki, bu layihə İspaniya Hərbi Hava və Kosmik Qüvvələrinin pilot hazırlığı imkanlarını yeniləmək və gücləndirmək məqsədi daşıyır.

"Bu sistem yeni və mürəkkəb təhlükəsizlik şəraitində əməliyyatlara hazırlığı artırmaq üçün nəzərdə tutulub. Müqavilə imzalandığı tarixdən 30 noyabr 2035-ci ilədək qüvvədə olacaq və uzadılma imkanı yoxdur." - deyə sənəddə qeyd edilir.

Təyyarələrin 2028-ci ildən etibarən təhvil verilməsinə başlanacaq. İlk HÜRJET-lərin 2029–2030-cu tədris ilində təlim proqramlarında istifadəsi və ən azı 30 il xidmət göstərməsi planlaşdırılır.

İspaniyanın müdafiə sənayesi xəbərləri yayan “Infodefensa” portalının məlumatına görə, layihədə Airbus əsas sənaye koordinatörü olacaq. Proqrama həmçinin Aciturri, Aernnova, Aertec, Airtificial, Amper, Indra, Sener kimi ölkənin 15 iri aerokosmik şirkəti də qatılacaq.

Hökumət layihəyə İspaniya Sənaye Nazirliyi tərəfindən 5 ilə bölünmüş 1,04 milyard avroluq kredit ayıracaq.

Digər mənbə — “Actualidad Aeroespacial” saytı isə yazır ki, müqavilə həm Airbusun dizayn, istehsal və sistem inteqrasiyası təcrübəsini, həm də Türk Havacılık ve Uzay Sanayii A.Ş. (TUSAŞ) tərəfindən hazırlanmış HÜRJET modelinin texnoloji üstünlüklərini birləşdirəcək.