BAKI, AzerVoice, Səməd Əyyubov

Türkiyədə İstanbul Polis İdarəsinin Mütəşəkkil Cinayətkarlıqla Mübarizə Şöbəsi əməkdaşları, cinayətkar dəstələrin ifşası və şübhəlilərin saxlanılması məqsədilə 15 iyul–13 avqust tarixləri arasında şəhər üzrə əməliyyatlar keçirib.

AzerVoice-un məlumatına görə, araşdırmalar nəticəsində "iş yerinə atəş açma", "hədə-qorxu", "quldurluq", "qəsdən xəsarət yetirmə", "icazəsiz silah istehsalı" və "qaçaqmalçılıq" kimi cinayətlərdə iştirak edən şəxslərin kimliyi və ünvanları müəyyən edilib.

Şəhərin Bağcılar, Kadıköy, Sarıyer, Şile, Sultanqazi, Bahçelievler, Beylikdüzü, Ataşehir, Bakırköy, Beşiktaş, Fatih, Silivri, Avcılar və Zeytinburnu rayonlarında keçirilən əməliyyatlar zamanı 42 hadisədə iştirak etdiyi müəyyən edilən 85 nəfər saxlanılıb.

Ünvanlarda aparılan axtarışlarda 111 ədəd tapança, bir əl qumbarası, 751 ədəd patron, 474 silah mexanizmi, 124 lülə, cinayət yolu ilə əldə edildiyi ehtimal edilən 4 100 lirə və 17 960 avro pul vəsaiti aşkarlanıb.

İstintaqdan sonra məhkəməyə çıxarılan şübhəlilərdən 69-u həbs olunub, 16 nəfər isə məhkəmənin qərarı ilə müəyyən məhdudiyyətlər qoyulmaqla azadlığa buraxılıb. Bundan başqa, 6 fərqli iş yerinə atəş açan 14 nəfər və silah alveri ilə məşğul olduğu müəyyən edilən iki nəfər də əməliyyat zamanı saxlanılıb.

Bundan əvvəl, Türkiyənin 9 şəhərində keçirilən fırıldaqçılığa qarşı genişmiqyaslı əməliyyat nəticəsində 12 nəfərin həbs olunduğu bildirilmişdi.