Bakı, AzerVoice

Türkiyənin Prezidenti Rəcəb Tayyib Ərdoğan, DEM Partiyasının İmralı heyəti ilə Beştepedə görüş keçirib. Təxminən 1 saat davam edən görüş mediaya qapalı şəkildə baş tutub.

AzerVoice-un məlumatına görə, qəbulda DEM Partiyasının təmsilçiləri – TBMM sədr müavini və Van millət vəkili Pervin Buldan, Şanlıurfa millət vəkili Mithat Sancar, həmçinin AK Partinin sədr müavini Efkan Ala və MİT sədri İbrahim Kalın iştirak ediblər.

Görüşdən əvvəl mətbuata açıqlama verən Pervin Buldan, görüşün əhəmiyyətini vurğulayaraq bunları deyib:

“Tarixi bir dövrdən keçdiyimizin fərqindəyik. Bu görüş çox önəmlidir. Prosesi, yaşanan problemləri və atılması lazım olan addımları müzakirə edəcəyik. Görüşdən sonra yazılı açıqlama ilə ictimaiyyəti məlumatlandıracağıq.”

Mithat Sancar isə, görüşün gündəmində prosesin indiki mərhələsi və gələcək addımların dayandığını bildirib:

“Fikirlərimizi və təkliflərimizi cənab Prezidentə təqdim edəcəyik. Onun da dəyərləndirmələrini dinləyəcəyik. Görüşün xeyirli nəticələr verəcəyinə inanırıq.”

Xatırladaq ki, dörd gün əvvəl PKK terror təşkilatı Türkiyə ərazisindən çəkildiyini elan etmişdi.