BAKI, AzerVoice

İsrail Qəzza xalqına qarşı törətdiyi cinayətlərə görə hüquq və tarix qarşısında cavab verəcək.

AzerVoice xəbər verir ki, bunu Türkiyə Prezidenti Rəcəb Tayyib Ərdoğan Qazaxıstan Prezidenti Kasım-Jomart Tokayevlə keçirdiyi mətbuat konfransında deyib.

"İsrail artıq 22 aydır Fələstin xalqını amansız şəkildə qətlə yetirir. Aclığın fələstinlilərə qarşı silah kimi istifadə olunması, İsrailin insanlıqdan nə qədər uzaq olduğunu açıq şəkildə göstərir. Qəzzadan yayılan görüntülər nasist düşərgələrindən belə daha dəhşətli, daha qəddar və qeyri-insani mənzərə yaradır. Dünya ictimaiyyətinin gözü qarşısında bir xalq aclıq və susuzluq içində ölümlə üz-üzə qalır" - deyə, Ərdoğan bildirib.

"Ümid edirik ki, Qəzza xalqına qarşı bu soyqırımı törədənlərin bir gün həm hüquq, həm də tarix qarşısında cavab verdiyinin şahidi olacağıq" - deyə, o əlavə edib.

Qeyd edək ki, 2023-cü il oktyabrın 7-dən bu günə qədər Qəzzada 60 min 34 nəfər ölüb, 145 min 870 nəfər yaralanıb. Səhiyyə mənbələri, həmçinin minlərlə cəsədin dağıntılar altında qaldığını və hələ də çıxarılmadığını bildirir.

Bundan əlavə, mayın 27-dən bu yana Qəzzaya humanitar yardım məqsədilə yaradılmış paylama məntəqələrinə edilən hücumlarda 1 179 fələstinli ölüb, 7 957 nəfər isə yaralanıb. Bu hücumların böyük əksəriyyətində mülki əhali hədəfə alınıb.