BAKI, AzerVoice
Birləşmiş Ərəb Əmirliklərindən (BƏƏ) İstanbula gedən "AirArabia" Hava Yollarına məxsus sərnişin təyyarəsi, mühərrikində baş verən nasazlıq səbəbilə Ankaranın Esenboğa Hava Limanına təcili eniş edib.
AzerVoice-un məlumatına görə, “ABY287” reysi ilə uçan "Airbus A320-214" tipli sərnişin təyyarəsinin sol mühərriki uçuş zamanı nasazlığa uğrayaraq dayanıb.
Bundan sonra təyyarənin kapitan pilotu Ankara Esenboğa Hava Limanına istiqamətlənərək təcili vəziyyət elan edib. Təyyarə tək mühərriklə problemsiz şəkildə uçuş-enmə zolağına enişini tamamlayıb.
Daxilində 144 sərnişin və ekipaj üzvünün olduğu bildirilən təyyarə xilasetmə qruplarının müşayiəti ilə təhlükəsiz dayanacaq sahəsinə çəkilib.
Sərnişinlərin təyyarədən təxliyə edilərək terminala alındığı bildirilib.
