BAKI, AzerVoice

Türkiyənin milli hava hücumundan müdafiə konsepsiyası olan “Polad Günbəz” sisteminin əsas elementlərindən biri sayılan “SİPER Ürün-2” uzun mənzilli raket kompleksinin 2025-ci ilin sonunadək Türkiyə Silahlı Qüvvələrinə (TSK) təhvil verilməsi planlaşdırılır.

AzerVoice xəbər verir ki, ASELSAN, ROKETSAN və TÜBİTAK SAGE-nin birgə istehsalı olan SİPER Ürün-2 sistemi, 100 kilometrdən artıq mənzili və inkişaf etmiş hədəf izləmə texnologiyası ilə beynəlxalq standartlara uyğun müdafiə həlli kimi qiymətləndirilir.

SİPER Ürün-2-nin ordunun istifadəsinə verilməsi TSK-nın uzun mənzilli hava hücumundan müdafiə potensialı əhəmiyyətli dərəcədə artacaq. Yeni sistem, hazırda istifadədə olan HİSAR-A və HİSAR-O kompleksləri ilə müqayisədə daha geniş radar əhatəsinə, daha yüksək aşkarlama və məhv etmə qabiliyyətinə malikdir.

Raket kompleksi təyyarə, qanadlı raket, pilotsuz uçuş aparatları və ballistik raketlər kimi yüksək sürətli təhdidlərə qarşı çoxqatlı müdafiə strategiyası çərçivəsində fəaliyyət göstərəcək. Bu xüsusiyyətləri ilə SİPER Ürün-2, Türkiyənin strateji obyektlərinin və kritik infrastrukturunun qorunmasında güc çarpanına çevriləcək.

Sistem, ASELSAN-ın hazırladığı radar və idarəetmə modulları ilə ROKETSAN tərəfindən istehsal olunan raket sistemlərini birləşdirərək yüksək dəqiqlikli hava müdafiə arxitekturası formalaşdırır. İnkişaf prosesində bir sıra çətin sınaqlardan uğurla keçmiş SİPER Ürün-2, beynəlxalq səviyyədə rəqabətədavamlı bir silah sistemi kimi dəyərləndirilir.

Layihə ASELSAN, ROKETSAN, TÜBİTAK SAGE və MKE şirkətlərinin əməkdaşlığı ilə həyata keçirilir.