BAKI, AzerVoice
Atəşkəs həm humanitar, həm də iqtisadi baxımdan müsbət təsir göstərəcək.
AzerVoice xəbər verir ki, Türkiyənin
vitse-prezidenti Cevdet Yılmaz İsrail və İran arasında əldə olunan
atəşkəsi qiymətləndirib.
O bildirib ki, bu razılaşma bölgədə artan geosiyasi gərginliyi
azaldacaq, eyni zamanda humanitar və ekoloji risklərin qarşısını
almaqla yanaşı, iqtisadi müsbət nəticələr də verəcək.
“İsrailin beynəlxalq hüquqa zidd olaraq İrana hücumları səbəbindən bölgəmizdə artan geosiyasi gərginlik bu gün əldə edilən atəşkəslə azalmağa başlayıb. Bu inkişaf humanitar və ekoloji riskləri azaltmaqla yanaşı, iqtisadi baxımdan da müsbət nəticələrə gətirib çıxaracaq. Lakin bölgənin əsl ehtiyacı ədalətli və davamlı sülhün təmin edilməsidir”- Yılmaz sosial media hesabında yazıb.
“Fələstin xalqı, xüsusilə də Qəzzada insan ləyaqətinə uyğun həyat şəraiti əldə etməlidir. Bu istiqamətdə Türkiyə təsirli bir güc və diplomatiya mərkəzi olaraq, cənab prezident Rəcəb Tayyib Ərdoğanın liderliyində Fələstin məsələsinə prioritet verməyə, sabitlik və ədaləti müdafiə etməyə davam edəcək”- Türkiyənin bu prosesdə mühüm rol oynadığını vurğulayan Yılmaz əlavə edib.
Qeyd edək ki, son günlərdə İsrail və İran arasında gərginlik pik həddə çatmış, lakin müxtəlif diplomatik kanallar vasitəsilə atəşkəs razılaşması əldə olunmuşdu. Atəşkəsin davamlılığı və bölgədə sabitliyin bərqərar olması üçün beynəlxalq ictimaiyyətin diqqəti artmaqdadır.
