BAKI,AzerVoice
Türkiyənin ilk açıq hava muzeyi YUNESKO-da qeydə alınıb.
AzerVoice xəbər verir ki, Osmaniye
şəhərindəki Karatepe Aslantaş Açıq Hava Muzeyindəki yazılar,
Anadolu və Finikiya dillərinin birgə işlədildiyi nadir nümunələr
olaraq YUNESKO-nun Dünya Yaddaş Reyestrinə daxil edilib.
Vali Erdinç Yılmaz, bu uğurun müxtəlif təşkilatların birgə apardığı araşdırmalar nəticəsində əldə edildiyini vurğuladı. İl Mədəniyyət və Turizm Müdirliyi, Osmaniye Qorqud Ata Universiteti və Qlobal Strateji Araşdırmalar Dərnəyinin birgə tədqiqatları sayəsində Anadolu Hiyeroglifləri ilə Feniki dillərində yazılan açıq hava muzeyindəki yazılar haqqında araşdırmalar aparılıb. Parisdə keçirilən YUNESKO iclasında qəbul edilən qərar ilə Karatepe Aslantaş kitabələri "Karatepe Yazıları" adı ilə Dünya Yaddaş Reyestrinə daxil edilib.
Vali Yılmaz, bu əhəmiyyətli hadisənin yalnız Osmaniye üçün deyil, bütün Türkiyə üçün böyük bir mədəni irs olduğunu bildirdi və kitabələrin qorunmasının gələcək nəsillər üçün vacib olduğunu vurğuladı. O, bu mədəniyyətin qorunmasını və gələcək nəsillərə ötürülməsini önəmli hesab etdiklərini qeyd etdi.
Qlobal Strateji Araşdırmalar Dərnəyinin prezidenti Mustafa Çakar, Karatepe Aslantaş kitabələrinin YUNESKO-nun Dünya Yaddaşı Reyestrinə daxil edilməsinin həm Osmaniye, həm də Türkiyə turizmi üçün mühüm bir inkişaf olduğunu və bunun dünya mədəniyyətinə böyük töhfə verəcəyini bildirdi.
