BAKI, AzerVoice
Türkiyə ilə Böyük Britaniya arasında Azad Ticarət Sazişi yenilənir.
AzerVoice xəbər verir ki, Türkiyənin
ticarət naziri Ömər Bolat sabah Böyük Britaniyaya səfər edəcək.
Səfər çərçivəsində Azad Ticarət Sazişinin (STA) yenilənməsi və iki
ölkə arasında iqtisadi əlaqələrin genişləndirilməsi üzrə danışıqlar
aparılacaq.
Londonda baş tutacaq səfər zamanı Bolatın Britaniyanın ticarət naziri Conatan Reynolds və İngiltərənin Türkiyə üzrə ticarət nümayəndəsi Əfzal Xan ilə görüşləri planlaşdırılıb. Eyni zamanda, Türkiyə-İngiltərə İş Forumunun açılışında çıxış edəcək nazir, iş dünyasının nümayəndələri ilə də fikir mübadiləsi aparacaq.
Bolat və Reynolds arasında keçiriləcək görüşdə illik ticarət dövriyyəsinin 30 milyard dollara çatdırılması üçün atılacaq addımlar və strateji əməkdaşlıq sahələri müzakirə olunacaq. İki ölkənin iş adamlarının iştirakı ilə keçiriləcək forumun isə yeni tərəfdaşlıqlar üçün mühüm platforma olacağı gözlənilir.
Səfərin əsas məqsədlərindən biri 2020-ci ildən qüvvədə olan Türkiyə-Böyük Britaniya STA-nın xidmət ticarəti, investisiyalar və kənd təsərrüfatını da əhatə edəcək şəkildə genişləndirilməsidir. Danışıqlarda həmçinin texniki ticarət maneələri, kimyəvi maddələr və motorlu nəqliyyat vasitələri üzrə yeni əlavələrin imzalanması da nəzərdə tutulub. Bu sahələr iki ölkə arasında ümumi ticarətin 33 faizini (7,4 milyard dollar) təşkil edir.
Yeni saziş texniki maneələrin azaldılması, uyğunluğun qiymətləndirilməsi prosedurlarının uyğunlaşdırılması və daha şəffaf, təhlükəsiz ticarət mühiti yaradılmasını hədəfləyir.
Qeyd edək ki, 2023-cü ildə Türkiyə ilə Böyük Britaniya arasında ticarət dövriyyəsi 22,1 milyard dolları keçib. İngiltərə 15,2 milyard dollarlıq göstərici ilə Türkiyənin üçüncü ən böyük ixrac bazarı olub. Həmin il Türkiyənin Böyük Britaniyadan idxalı 6,8 milyard dollar təşkil edib, bu ölkə isə 8,6 milyard dollarlıq birbaşa investisiya ilə Türkiyədəki 7-ci ən böyük sərmayədar kimi qeydə alınıb.
