BAKI, AzerVoice
Türkiyənin Ətraf Mühit, Şəhərsalma və İqlim Dəyişikliyi Naziri Murat Kurum İstanbulda baş verən zəlzələlərin ardından aparılan zərərin qiymətləndirilməsi ilə bağlı son vəziyyəti açıqlayıb.
AzerVoice xəbər verir ki, nazir Kurum sosial media hesabında paylaşdığı məlumatda İstanbulun 39 rayonunda aparılan araşdırmalar çərçivəsində bu günə qədər 8 min 367 binanın yoxlanıldığını bildirib.
Nazirin sözlərinə görə, 7 min 113 bina zədələnməyib, 437 binada isə cüzi ziyan qeydə alınıb. O əlavə edib ki, qiymətləndirmə işləri tamamlandıqdan sonra lazımi addımlar atılacaq.
Nazir Kurum paylaşımında ən çox bildiriş alan rayonların da adlarını çəkib. Bunlar arasında Bahçelievler (1171 bildiriş), Esenler (995), Küçükçekmece (937), Bağcılar (581) və Avcılar (495) rayonları ön sıradadır.
Qeyd edək ki, İstanbulun Silivri sahillərində baş verən 6,2 bal gücündə zəlzələ şəhərdə və ətraf vilayətlərdə güclü şəkildə hiss olunub. Hadisə nəticəsində can itkisi qeydə alınmasa da, çaxnaşma səbəbindən yüksəklikdən tullanaraq xəsarət alanlar olub.
