BAKI, AzerVoice
Əsəd rejiminin devrilməsindən sonra 1,5 milyondan çox suriyalı geri qayıdıb.
AzerVoice xəbər verir ki, Birləşmiş Millətlər Təşkilatının (BMT) Humanitar Məsələlərin Koordinasiya Ofisinin (UNOCHA) Əməliyyatlar və Müdafiə Birliyinin direktoru Edem Wosornu Suriyaya qayıdan əhali ilə bağlı açıqlama verib.
Wosornu bildirib ki, 8 dekabr 2024-cü ildə Bəşər Əsəd rejiminin devrilməsindən sonra ölkə daxilində 1 milyon, qonşu ölkələrdən isə yarım milyondan çox suriyalı öz bölgələrinə qayıdıb. O, BMT-nin Cenevrə ofisinin Qaziantepdən keçirdiyi onlayn brifinqdə çıxış edərək Suriyadakı humanitar vəziyyəti dəyərləndirib.
Wosornu qeyd edib ki, hazırda Suriyada 16,5 milyon insanın humanitar yardıma və müdafiəyə ehtiyacı var. BMT və tərəfdaş qurumlar bütün çətinliklərə baxmayaraq, ay ərzində orta hesabla 2,4 milyon insana yardım çatdırır.
BMT rəsmisi, ABŞ və Avropa İttifaqının Suriyaya qarşı sanksiyaları yumşaltmaq qərarlarını alqışlayaraq, bu addımların ölkədə bərpa və inkişaf prosesinə töhfə verəcəyinə ümid etdiklərini bildirib. O əlavə edib ki, beynəlxalq qurumlar Suriyadakı müvəqqəti idarəetmə strukturları ilə sıx əməkdaşlıq edəcəklər.
Qeyd edək ki, Edem Wosornu ilin əvvəlindən bu yana minə yaxın humanitar yardım maşınının Suriyaya daxil olduğunu və bu prosesdə Türkiyə də daxil olmaqla bir sıra tərəfdaşların mühüm rol oynadığını vurğulayıb.
