BAKI, AzerVoice, Nailə Babazadə

Banqladeş məhkəməsi sabiq baş nazir Şeyx Hasinaya korrupsiya ittihamı ilə 21 il həbs cəzası verib. Qeyd edək ki, bir həftə əvvəl o, keçən il baş verən tələbə qiyamını qırmaq əmri verdiyi üçün insanlığa qarşı cinayətlərdə təqsirli bilinərək ölüm hökmünə məhkum edilmişdi.

AzerVoice xəbər verir ki, 78 yaşlı Hasina hazırda Hindistanda yaşayır və ölkəyə qayıtmaqla bağlı məhkəmə qərarını yerinə yetirməyib. Məhkəmə hakim Abdullah Əl Mamun qərarında, Hasinanın “ictimai torpaqları şəxsi mülkiyyət kimi istifadə etməsi və dövlət resurslarından özünə və yaxınlarına fayda götürmək üçün rəsmi prosedurları manipulyasiya etməsi”ni vurğulayıb.

Hasinanın ABŞ-da yaşayan oğlu Sajib Vazed və qızı Sayma Vazed isə hər biri 5 il həbs cəzasına məhkum edilib. Hasina 5 avqust 2024-cü ildə ölkəni tərk etmişdi.

Ölkədə siyasi gərginlik davam edir, fevral 2026-cı ildə keçiriləcək seçkilər öncəsi zorakılıq halları qeydə alınır. BMT hesab edir ki, Hasinanın hakimiyyəti dönəmində qiyamı yatırmaq üçün həyata keçirilən zorakılıqlarda 1 400-ə qədər insan həlak olub.

Hasina hökmü “siyasi motivli və qərəzli” adlandırıb. O, həmçinin öz və yaxınları əleyhinə açılmış digər üç korrupsiya işi üzrə mühakimə olunur.