BAKI, AzerVoice

İslam mənbələrinə görə, Məhəmməd Peyğəmbərə (s.ə.s.) vəhylər onun vəfatına qədər davam edib. Buxari və Müslim tərəfindən nəql olunan rəvayətlərdə bildirilir ki, Peyğəmbərin ömrünün son günlərində vəhyin gəlməsi daha da tezləşib.

Həzrət Ənəs ibn Malik (r.a.) bu barədə belə deyib:

“Allah-Təala Peyğəmbərin vəfatından əvvəl vəhyi tezləşdirdi. Elə ki, o, vəhylərin ən sıx gəldiyi bir vaxtda dünyasını dəyişdi.”(Buxari, Fəzailül-Quran, 1; Müslim, Təfsir, 2)

İslam alimləri qeyd edir ki, vəhylərin son dövrlərdə artması, həm İslam cəmiyyətinin formalaşması və yeni müsəlmanların dini ehtiyaclarının ödənməsi, həm də Peyğəmbərin dünyadan ayrılmasının yaxınlaşdığına dair ilahi bir işarə idi.

Nəvəvi kimi klassik islam alimləri bu hadisəni “ömrün sonunda xeyir işlərin çoxaldılmasına təşviq edən ilahi bir qayda” kimi dəyərləndirirlər.

Alimlərə görə, vəhylərin tezləşməsi həm dini sistemin tamamlanmasını, həm də Peyğəmbərin missiyasının sona çatmaq üzrə olduğunu göstərirdi.

Peyğəmbərin vəfatından əvvəl vəhylərin tez-tez gəlməsi, insanlara son anlarını xeyir işlərə və ibadətə sərf etməyin önəmini xatırladan ilahi bir mesaj kimi dəyərləndirilir.