BAKI,AzerVoice
İslam mənbələrində qiyamətdən əvvəl baş verəcəyi bildirilən hadisələr arasında Kəbənin dağıdılması ilə bağlı hədislər xüsusi yer tutur. Bu rəvayətlərə əsasən, qiyamətə yaxın bir dövrdə Kəbənin bir Habeşli tərəfindən dağıdılacağı xəbər verilir.
Bu mövzu ilə bağlı Peyğəmbərimiz Həzrət Məhəmməddən (s.ə.s) nəql olunan hədisdə deyilir:
“Kəbəni balaca və nazik ayaqlı bir Habeşli dağıdacaq.”
(Bax: Buxari, Həcc, 47, 49; Müslim, Fitən, 57–59)
İslam alimlərinin əksəriyyəti bu hədisi qiyamət əlamətlərindən biri kimi qiymətləndirir. Lakin qeyd olunur ki, hadisənin dəqiq vaxtı və hansı şəraitdə baş verəcəyi barədə konkret məlumat verilməyib. Alimlər bu dağıntının böyük bir fitnə, fəlakət və ya dünya nizamının pozulması ilə əlaqəli ola biləcəyini bildirirlər. Bəzi təfsirçilər və müasir alimlər isə bu hədislərin yalnız fiziki dağıntını deyil, Kəbənin müqəddəsliyinə yönəlmiş hücumları və ya onun dini əhəmiyyətinin zəifləməsini simvolizə edə biləcəyini vurğulayırlar. Bununla belə, klassik və ənənəvi yanaşmaya görə, söhbət real və fiziki bir hadisədən gedir və bu, qiyamətin yaxınlaşdığına işarə sayılır.
Mənbələrdə qeyd olunur ki, bu hadisə yer üzündə artıq “Allah, Allah” deyən, yəni Allahın adını zikr edən heç kimin qalmadığı bir dövrdə baş verəcək. Həmin vaxtdan sonra Kəbə bir daha ziyarət olunmayacaq və bərpa edilməyəcək.
Bəzi alimlərin fikrincə isə, Kəbənin dağıdılmasından sonra müəyyən müddət ərzində yenidən bərpa edilə biləcəyi və Həcc ilə Ümrə ibadətlərinin davam etdiriləcəyi ehtimalı da istisna edilmir. Bu mövzu ilə bağlı Nəvəvi, İbn Həcər və İbn Battal kimi alimlərin hədis şərhlərində müxtəlif yanaşmalar mövcuddur.
Ümumilikdə, İslam mənbələrində Kəbənin qiyamətdən əvvəl dağıdılması məsələsi Qurani-Kərimlə ziddiyyət təşkil edən bir anlayış kimi təqdim edilmir. Quranda Məkkənin “Əmin Bələd” – yəni təhlükəsiz şəhər kimi təsvir edilməsi, bu təhlükəsizliyin qiyamətə qədər davam edəcəyinə dair ümumi bir mənanı ifadə edir.