BAKI,AzerVoice

İslam dini müsəlmanların gündəlik həyatının nizamlı və ahəngdar olmasını istəyir. Bu mövzu həm Quranda, həm də hədislərdə geniş şəkildə izah olunub.

Xüsusilə diqqətçəkən məqamlardan biri odur ki, Peyğəmbər Məhəmməddən (s.ə.s) gündəlik həyatla bağlı nəql olunan hədislərin böyük bir qismi məhz yemək ədəbi ilə bağlıdır. Rəsulullah bütün işlərinə Allahın adını çəkərək başlamağı xoşlayardı. Yeməkdən öncə əllərini yuyar, sağ əli ilə və qarşısında olan yeməyi yeyərdi.

İslamda yemək ədəbinin əsas qaydaları belədir:

Yeməyə “Bismillahirrəhmanirrəhim” deməklə başlamaq. Əgər yeməyə başlamazdan əvvəl unutqanlıq olsa, “Əvvəldə və sonda Bismillah” demək.

Yeməyi yaxşıca çeynəyib sonra udmaq, ağzındakı tikəni udmadan yeni tikə götürməmək.

Çörəyi dişlə qoparmamaq.

Ağzında tikə olduğu halda danışmamaq.

Yeməyin soyuması üçün içinə üfürməmək.

Başqalarını iyrəndirəcək hərəkətlər etməmək.

Başqalarının yeməyinə baxmamaq və onların yemə formasına diqqətlə nəzər salmamaq.

Yemək yeyərkən başı boşqaba yaxınlaşdırmamaq.

İsraf etməmək, yeməyi tam şəkildə bitirmək.

Ağzından hər hansı şey çıxarmaq lazım gəlsə, üzünü süfrədən çevirib sol əllə ağzını örtərək etmək.

Çörəyi yeməyə batırarkən barmaqları yeməyə salmamaq.

Qonaqlar olduğu zaman süfrədən ilk qalxmamaq, hamının yeməyi bitirməsini gözləmək.

Yemək zamanı yaşca böyüklərin əvvəl oturması və başlaması.

Küçədə və ayaq üstə yemək yeməmək.

Yeməkdən sonra Allahın nemətlərinə şükür etmək, “Əlhəmdülillah” demək.

Yemək bitdikdən sonra əlləri yaxşıca yumaq və dişləri təmizləmək.

Bu qaydalar həm fərdi gigiyena, həm də cəmiyyət içində qarşılıqlı hörmət və ədəb baxımından İslam mədəniyyətinin dərin hikmətini göstərir.