BAKI, AzerVoice, Fərid Mikayılov
Portuqaliya mətbuatının yaydığı xəbərlərə görə, Kristiano Ronaldo transfer siyasətindən narazı qaldığı üçün Əl-Nəsrin Səudiyyə Ərəbistanı Premyer Liqasındakı növbəti oyununda iştirakdan imtina etməyi düşünür.
AzerVoice xəbər verir ki, beşqat “Qızıl top” sahibi olan 40 yaşlı hücumçu Yaxın Şərqdə özünü narahat hiss edir və bu narazılıq yerli derbidə — Əl-Riyadla oyunda meydana çıxmamaq ehtimalını gündəmə gətirib.
Əvvəlcə Ronaldonun oyundan kənar qalmasının səbəbi kimi fiziki yüklənmənin idarə olunması göstərilsə də, Portuqaliyanın A Bola nəşri bu iddiaları təkzib edib. Qəzetin yazdığına görə, mümkün yoxluq “portuqaliyalı hücumçunun fiziki vəziyyəti ilə əlaqəli deyil”.
Məlumata görə, Ronaldo klubun üç ildir təmsil olunduğu müddətdə Səudiyyə Ərəbistanının Dövlət İnvestisiya Fondu (PIF) tərəfindən Əl-Nəsrə göstərilən münasibətdən narazıdır və eyni fond tərəfindən idarə olunan rəqib klublarla müqayisədə komandasının yetərincə dəstək almadığını düşünür.
Komandanın kapitanı olan Ronaldo qış transfer pəncərəsində yetərli gücləndirmənin edilməməsindən məyusdur. Baş məşqçi Jorje Jezush indiyədək heyəti genişləndirmək üçün tələb olunan maliyyə dəstəyini almayıb. Bu müddətdə komandaya yalnız İraqdan transfer olunan 21 yaşlı yarımmüdafiəçi Hayder Əbdülkərim qoşulub.
Həmçinin Ronaldonun həmyerliləri — idman direktoru Simao Koutinyo və icraçı direktor Joze Semedonun səlahiyyətlərinin ayın əvvəlindən etibarən məhdudlaşdırıldığı bildirilir.
Ronaldo hesab edir ki, hazırkı idarəetmə modeli Əl-Hilalla müqayisədə Əl-Nəsr üçün zərərlidir. Mətbuatda, lider mövqedə olan Əl-Hilalın Ronaldonun sabiq “Real Madrid”li komanda yoldaşı Kərim Benzemanı transfer edə biləcəyi barədə iddialar da yer alıb. Türkiyə mediası isə Ronaldonun Benzemanın mümkün keçidinə “ədalətli rəqabət mühitinə zərər verəcəyi” arqumenti ilə qarşı çıxdığını yazır.
Bu, Ronaldonun Səudiyyə Pro Liqasında baş verənlərə ilk dəfə etiraz etməsi deyil. Yanvarın ortalarında baş məşqçi Jorje Jezush “klubun Əl-Hilal qədər siyasi gücə malik olmadığını” demiş, Ronaldonun da bu mövqeyi dəstəklədiyi bildirilmişdi.