BAKI, AzerVoice, Fərid Mikayılov
İnter Mayami klubunun ispan ulduzu Serxio Busqets mövsümün sonunda peşəkar futbola vida edəcəyini açıqlayıb.
AzerVoice xəbər verir ki, 37 yaşlı futbolçu hazırda MLS-də İnter Mayami forması ilə 69 oyuna çıxıb.
Onun klubla müqaviləsi dekabrda başa çatır. Busqets mövsümün sonuna qədər komandanın tarixində ilk dəfə MLS Kubokunu qazanmaq uğrunda mübarizə aparacaq.
Busqetsin klub karyerası Barselonada başladığı 2008-ci ildən dünya futbolunun ən uğurlu hekayələrindən birinə çevrildi. O, Barselonanın heyətində 722 oyuna çıxaraq 9 dəfə La Liqa, 3 dəfə Çempionlar Liqasını qazanıb.
İspaniya millisində isə 143 dəfə meydana çıxan yarımmüdafiəçi 2010-cu ildə Cənubi Afrikada keçirilən mundialda dünya çempionluğuna yüksəlib.
“İnanılmaz bir yol oldu. Deyə bilərəm ki, artıq vida deməyin vaxtı çatıb. Təxminən 20 il arzuladığım, zövq aldığım bu hekayəni yaşadım. Bu aylar mənim son oyunlarım olacaq. Futbolu xoşbəxt, dolğun və hər kəsə minnətdar halda tərk edirəm”- deyə o bildirib.